6 bnai khlem ioh bai bylla ki nongtrei muster roll naka PWD South Jowai Division

Syllad | The Rising MeghalayaOctober 7, 2020

Ka synjuk jong ki nongtrei muster roll hapoh ka lama jong ka All Jaiñtia Muster Roll Workers & Labour Union (AJMRWLU) kila rah da ka jingthoh placard ban pynlong iaka jingiakhih kaba jai jai hadien ba ki nongtrei muster roll kim shym la ioh bai bylla la 6 bnai kynthih naka ophis treikam jong u EE PWD South Jowai Division mynta ka sngi.

Ki nongialam ka AJMRWLU kila leit mih sha ka ophis jong u Executive Engineer ka PWD (Road) South Jowai Division u ma B. Niangti bad rah da ki jingthoh placard ban dawa ban pynioh iaka bai bylla kaba ki dei hok ban ioh.

U President AJMRWLU u KL Pariat ula ong ba na kaliang u EE ula kular ban pyrshang ban wad ki lad ki lynti na ka bynta ban pynïoh noh ïa ka bai bylla jong ki muster roll hadien ka jingiakhih jong ki.

“Kane ka jingduh tulop ki Muster Roll la bun bun bnai ka la buh jingeh ïa ki ban pyndap pynbiang ïa ki jingdonkam ha ki ïing ki sem bad la rai ban pynlong iaka jingiakhih tad haduh bala ioh iaka bai bylla,” la ong u ma Pariat bad ula bynrap ba kiwei ki tnad jong ka PWD kim shym la pynsahteng iaka bai bylla ki nongtrei muster roll.