6 ngut kiba khlad tang ha u bnai K’lyngkot 2024, 40 ngut ha u snem 2023, kyntu husiar haka niah kali

Syllad | The Rising MeghalayaFebruary 15, 2024

Ka District Transport Officer East Khasi Hills District ha ka jingïatreilang bad ki bor pynïaid district bad ka tnad Pulit haka 14 tarik Rymphang kala pynkut noh iaka jingrakhe iaka Nation Road Safety Month 2024 haka jingialang kaba long haka jaka pynïeng kali kaba don marpyrshah bad ka SBI Main Branch, Shillong.

Ha ka jingkren ha katei ka program u Superintendent of Police (Traffic) u K Prasad u la ong ba kane ka jingrakhe ka long shibynta ban pynsngewthuh halor ka jingshngaiñ ki nongñiah kali bad ki nongpyndonkam bad ïa kane ka National Road Safety Month ne ka jingrakhe kaba shi bnai lynter halor ka jingshngain ka niah kali ha ki lynti syngkieng la rakhe ha baroh kawei ka ri India.

U la ong ruh ba manla u snem ki don da ki hajar ngut kiba la duhei la ka jingim na ka daw jong ka jingaksiden bad ka daw jong kane ka dei na ka jingñiah kali khlem akor bad ka jingpynher sted ïa ki kali bad jingbym burom ïa ka hok jong kiwei pat.

U la pyntip ruh ba ha une u snem ba la dep ki pulit ka jylla ki la rejister 46 tylli ki case bad 40 ngut kila duhei la ka jingim naka jingjia aksident kiba la pyntip sha ki pulit bad 15 percent ki dei kiba la mynsaw.

Katba ha u bnai Kyllalyngkot 2024, u bnai bala dep la dep, ki pulit kila rejister 6 tylli jingjia aksiden bad ha kine ki jingjia ki don 6 ngut kila khlad bad 13 ngut kiba la mynsaw jur.

Na ka liang u Prasad u la kyntu ïa ki nongñiah kali ban husiar bad phikhir haba niah kali bad ym dei satia ban kyntur palat ha ki surok ba khapngiah jong ka nongbah Shillong. U nongñiah kali u hap ban kitkhlieh ym tang iaka jingim lajong, hynrei iaka jong kiwei ruh. U nongniah kali u dei ban sngewthuh ba ki dei ban niah iaka kali da kaba long phikir bha manla ka teng ba ki ñiah kali.

Ka Deputy Commissioner East Khasi Hills District, kong RM Kurbah ha ka jingkren halor ki nongñiah kali ha kane ka program jong ka National Road Safety Month ka la ong ba kane ka jingrakhe ka long kaba kongsan namar ka dei kaba ïakren shaphang ka jingim, ka jingim briew ka long kaba kordor bad ngim dei ban lehkai bad ka jingim.

Ka la ong ruh ba ka long kaba donkam ban pynlong kum kine ki program manla ka por, ban pynsaphriang jingtip kiba donkam namar ngi kren iaka jingim briew bad ka jingim briew kalong kaba kordor. Ka long ruh bun na ngi, ngi tip tang halor ka hok lajong, hynrei ngim ju shimkhia halor ki kamram ba ngi dei ban pyndep.

Ka Kong Kurbah ka la kyntu ruh ki kmie ki kpa ban shim ka jingkitkhlieh bad ai jingmut ïa ki khun ki kti kaei kaba ki donkam bad ym donkam ban leh, namar ki don ki por ba lada jia ka jingshah tynrah jong ki khynnah ne kiba la heh la san baroh ka jingkitkhlieh ka hap beit ha ka lyngkor jong u nongñiah kali.