6 tylli ki jingtei thymmai ioh ka Dr Norman Tunnel Hospital na ka spah ba iehnoh u pastor ba na ri Wales

Syllad | The Rising MeghalayaJanuary 20, 2023

Ban pynbha bad ban pynbiang iaka jingshakri sha ki paid nongpang katkum ka jingiaid ka por, ka Dr Norman Tunnel Hospital, Jowai kaba dei kawei na ki hospital shimet kaba rim tam ha rilum Jaintia kala ioh ban plie iaki 6 tylli jingtei ba thymmai jong ka haka sngi Thohdieng.

Ia kine ki jingtei la ioh na uwei u pastor uba la khlad ha u snem 2018, u Rev D. Leslie Jones uba shong ba sah hajan ka nongbah Swansea ha ri Wales uba la iehnoh shadien iaka spah bad synniang sha kane ka hospital.

Kine ki jingtei thymmai ban pynsuk iaki paid nongpang ban ioh iaka jingsumar ha kane ka hospital ki kynthup iaka Ramp Access way, ka Maternity Block, Elevator/Lift, Physiotherapy Block, Administrative building bad ka Retaining Wall.

Kane ka hospital kadei kaba la shah bam duh haka ding ha u bnai Iaiong 2 tarik 2001, hynrei kane kam shym la khang lad ia kane ka hospital ban kiew rasong bad iaid shakhmat ban pynbiang iaka jingshakri ia ki paid nongpang da ka jingsynniang ki para ba ngeit kiba don hapoh ka Khasi Jaintia Presbyterian Assembly bad ki paidbah na kylleng la lah ban pynïeng biang ia ka building bathymmai.

Kane ka hospital ka don iaka OT Complex, ka ICU bad katto katne tylli ki OPD Rooms. Ka mala ba nyngkong ka dei Children’s Ward. Ka mala kaba ar la tei ïaka Maternity Complex bad ïaka jingtei la pyndep ha u snem 2019, hynrei na ka daw ka jingbym don jong ka lift bad jingbymdon jong ka Ramp ym shym la lah ban plie ïaka Maternity Complex. Dei mynta ka kynti la plie ia kine jingtei ban pynbha shuh shuh iaka jingshakri kane ka hospital.

Ïa kine ki hynriew tylli ki shnat treikam (project) la synñiang pisa da u (Late) Rev D. Leslie Jones uba shong ba sah hajan ka nongbah Swansea ha ri Wales kumba 1 klur 90 lak 7 hajar 3 spah tyngka, kumjuh na ka Balang Presbyterian Laitumkhrah kumba 26 lak tyngka nalor ki skim MP.

Da kane ka pisa ba synniang u Rev D. Leslie Jones la ioh ban tei ïaka Laundry Unit kaba don Artylli ki industrial washing machine bad artylli ki washer kiba la long ka jingkyrkhu ïaka hospital.

Ka Dr. D Nongpluh Medical Superintendent Dr Norman Tunnel Hospital kala iathuh haka jingwan lyngshop ka khlam COVID ha u February 2020 kala ïoh pdiang ia kawei ka phone call na uwei u paralok ba jan bha jong ka hospital u Gwynn Angel Jones member PCW uba la ïathuh ba u (Late) Rev. D. Leslie Jones uba la khlad ha u snem 2018 ula synñiang ïa baroh ka pisa jong u sha ka Dr. Norman Tunnel Hospital Jowai. Kala ïathuh ba ka pisa baroh kaba u Rev. D. Leslie Jones ula iehnoh shadien na ka bynta ka Dr. Normal Tunnel Hospital, Jowai ka long 2 lak 6 hajar British pound bad haba la pynkylla sha ka pisa India ka la kot sha ka 1 klur 90 lak 7 hajar 3 spah tyngka.

Ia jingialang plie ia kine ki jingtei la pynlong ha phyllaw ka hospital ha kaba u Rev. BB. Lamin, Moderator PCI General Assembly ula long kum u kongsan haka jingiadonlang kiwei kiwei ki pastor, ki tymmen basan, ki rangbah Balang, ki nongïalam na sengkynthei bapher bapher bad kiwei kiwei.

La ïoh ka jingkren lyngkot na ka Evarinia L Warjri, MCS, Additional Deputy Commissioner, West Jaintia Hills, Rev. D Rymbai, Moderator KJP Assembly, u Dr. KC Ajar District Medical & Health Officer, West Jaintia Hills District bad na ka Dr. D Nongpluh Medical Superintendent Dr Norman Tunnel Hospital kaba la iathuh iaka jingiarap ba la ioh ka hospital. Ïaka jingïalang la pynïaid da u Rev NS. Phawa Chairman Managing Committee.

Ha kane ka sngi la pynkup burom ïaka Jingïaseng Samla Balang Jowai kaba la synñiang snam sngewbha sha kane ka Hospital.

Nalor ki nongïalam na ki Balang Presbyterian bapher bapher la donlang ruh u Rev. Fr. Hilarius Lamare, u Dolloi ka Elaka Jowai u Bah Puramon Kynjing, u President ka Seinraij Jowai u Ma OR Shallam bad kiwei kiwei kiba shah khot sngewbha.