7 ngut ki nongiakhun iaka kam Dolloi ha elaka Nartiang bad Shangpung

Syllad | The Rising MeghalayaMarch 17, 2022

Ka Jaintia Hills Autonomous District Council (JHADC) kala long kaba pynkhreh nadong shadong ban pynlong ïaka Elekshon jied Dolloi ba thymmai na bynta ka Elaka Nartiang bad Elaka Shangpung.

Katkum ka jingpynbna jong ka JHADC kane ka jingjied Dolloi thymmai ha Elaka Shangpung bad Elaka Nartiang kan long haka 23 tarik une u bnai. Ka jingniew vote kan long haka 25 tarik une u bnai.

Kane ka elekshon jied Dolloi kadei hadien ka jingkhlad noh jong ki Dolloi ha kitei ki Elaka kynthup u Hepsing Dhar Dolloi Elaka Nartiang uba la khlad ha u snem 2021 bad u Wenly Dhar Dolloi Elaka Shangpung uba la khlad ha u snem 2015.

Ka Secretary Executive Committee & Returning Officer, Dolloiship Election haka 15 tarik une u bnai kala dep pynlong iaka jingjurip iaki kot ki sla jong ki kyrtong kiban ialeh ia kane ka elekshon dolloi ha kitei ki ar tylli ki elaka.

Haba phai sha ka Elaka Shangpung ki don 3 ngut ki kyrtong ki ban aireng ha kane ka elekshon Dolloi bad kine ki kynthup ia u Acting Dolloi Chanki Langbang, u ban ïeng haka shap jong ka ‘Sngi’, u Daeiladmi Sungoh u ban ïeng haka shap ka ‘Jingkieng’, bad u Harising Papang u ban ïeng haka shap u ‘Khlur’.

Katba ha Elaka Nartiang pat la don 4 ngut ki kyrtong kynthup u Helpmi Dhar uba ïeng ba ka shap jong u ka dei ka ‘Wait’, u Jomeo Dkhar haka shap ‘Parla, u Leibanki Dkhar haka shap ka ‘Jingkieng’ bad u Salong Lamare haka shap ka ‘Sngi’.