7 snem ha phatok shah rai pynrem uba rahbor ia ka khynnah ha WGH

Syllad | The Rising MeghalayaAugust 10, 2023

Ka kashari jong u nongbishar ba kyrpang ka POCSO, West Garo Hills District ka la rai pynrem ia u Md. Anishur Rahman da kaba set phatok hynniew snem kynthih namar ka jingdonkti ha kaba rahbor ia kawei ka khynnah kaba dang 14 snem rta kaba la jia naduh kine ki hynriew snem ba la dep.

Ki bor pulit kila ong ba ha ka 18.03.2017 ka tnat pulit Tura Women PS ka la ioh pdiang ia ka jingtip ha ka 14.03.2017 ba kawei ka khynnah kaba dang 14 snem rta ka la jah rngai hadien ba ka la leit sha ka shnong Chibinang da ka kali tempo.

Ki pulit ki la iathuh ba u Anishur Rahman uba dei u nongniah jong kane ka kali tempo bad uba dei ruh u khun jong u Sarhab Ali uba don ia kawei ka dukan furniture ha Chibinang kaba hap hapoh PS Phulbari, West Garo Hills u la rahbor ia kane ka khynnah ban set ha ka jaka ka bym lah satia ban tip.

Halor kane ka jingjia la rejistar case hapoh Tura Women PS katkum ka case PS Case No. 17(3)2017 u/s 366A/368 IPC R/W sec 3(a)/4 POCSO Act bad ia ka jingtohkit la shimti da ka UB/WPSI ka Renu D. Momin. Hadien ka jingtohkit kaba bniah la aiti ia ka charge sheet ha ka 31.01.2018.

Hadien ba la dep ka jingtian bishar ka ka kashari ba kyrpang jong u nongbishar POCSO, West Garo Hills, Tura ka la pynngat ia utei uba la shah kynnoh donkti ha ki kyndon Section 3(a)/4 POCSO Act bad rai pynrem da kaba set phatok hynniew snem kynthih nalor ka kuna kaba T.5000 (san hajar) bad lada ym lah siew iaka kuna un shah set phatok sa lai bnai.