7 snem khlem bording shong ka shnong khappud Meghalaya Assam

Syllad | The Rising MeghalayaJuly 7, 2020

Nalor ka jingeh kaba ki iakynduh na ka jingpyndik ka sorkar Assam bad kiwei kiwei ki jingeh, ki nongshong shnong ha khappud Meghalaya Assam kila hap ban shong khlem bording mynta la 7 snem kynthih.

Kane ka shnong kaba mad ia kane ka jingeh ban shong khlem bording kadei ka shnong Saba kaba don marjan bad ka shnong Barato West Jaintia Hills District.

U Waheh Shnong ka shnong Saba u ma Roming Suchiang, u la iathuh ba na ka liang ka ka bor shnong bad kumjuh ruh ka Committee jong ka shnong na ka por sha ka por ki la leit ud leit nam sha ki engineer ka Meghalaya Energy Corporation Limited (MeECL), hynrei haduh mynta la pynioh bording ia kane ka shnong.

Kaba phylla ka line bording kala don lypa bad ka jingthud kadei tang ha u transformer ban sam bording sha kane ka shnong, pynban haduh mynta ym shym la maramot ne bujli ia une u transformer bad ki post light ban pynioh ding ia kane ka shnong.

“Kane ka shnong ka don tang 200 tylli ki longiing bad kumba long mynta baroh ki longiing ki hap ban pyndonkam tang da ki solar light bad ngi shem jingeh bha haka shitom shipa bad ka por pule kot ki khun ki kti,” la ong u ma Suchiang.

“Ngi la ujor sha ki nongmihkhmat kynthup ia ki MDC bad MLA kiba rim bad kiba mynta ruh haduh mynta ym don ba iarap ban pynioh bording ha kane ka shnong,” ong shuh shuh u ma Suchiang.