750 ngut ki khynnah skul kiba iakhun iaka exam scholarship ka WJSU

Syllad | The Rising MeghalayaDecember 12, 2024

Haduh 750 ngut ki khynnah pule haka thain War Jaintia kila register ban iakhun iaka First War Jaintia Scholarship Examination 2024 kaba la pynbeit da ka War Jaintia Students’ Union (WJSU).

Ia kane ka eksam scholarship la pynkhreh ban pynlong ha ki 14 tylli ki exam centre ha baroh kawei ka Amalrem Sub Division. La buh tarik ba kane ka eksam kan long haka 14 tarik Nohprah bad ka result yn pynbna haka 21 tarik Nohprah 2024.

Ka WJSU Education Sub Committee kala pyntip ba ka jingpynkhreh pynkhrum ia ki jingdonkam baroh na ka bynta kane ka eksam scholarshhip.

Ha u kyrwoh la pynpaw: Ki don750 ngut ki khynnah ka ban ia khun ia kane ka competitive examination ha ki 14 tylli ki examination centre bad baroh kine ki jaka thoh eksamin buh iaki briew ban peit iaka jingialeh eksam ba kan long kaba khuid kaba suba.

Ki khynnah kiba iashim bynta ha kane ka exam ha ka section I ki dei ki khynnah kiba lah pyndep ia ka class IV ha u snem 2023 bad kiban shong class VI ha une u 2025. Ha ka section II ki khynnah skul kiba la pyndep ia ka class VI ha u snem 2023 bad kiban shong class VIII ha une u snem 2025 bd ha ka section III ki khynnah skul kiba la pyndep ia ka class VIII ha u snem 2023 bad ki ban shong class X ha u snem 2025, ong u kyrwoh ka WJSU.

Ka seng WJSU bad ki paidbah ka thain War Jaintia ki ai khublei kitbok kitrwiang ia kine ki khynnah skul kiba dei ki khlur ka thain bad ka Ri ha ki sngi ki ban dang wan ba kin leh bha ha kane ka Competitive Examination 2024.

Ka seng ka ai khublei kyrpang ia ki dkhot kiba trei shitrhem ban pynurlong ia kane ka jingthrang bad ka jingangnud ban kyntiew ia ka pule puthi ba dei u budlum ka roi ka par ha ka Ri.

Ka seng ka ai khublei kyrpang ruh ia ki nonghikai badon burom kham tam ki Headteachers, Headmasters bad Principal jong ki skul kiba ai iaka jingiatrei lang bad ka seng ban pynurlong ia kane ka kam ba bha na ka bynta ka lawei kine ki khynnah skul ka thain.

Ka seng lyngba u General Secretary samla Everest R Langstang ka kyntu ia ki paid ka thain ban ia snoh kti lang ban leh ia ki kam bha na ka bynta ki nongshong shnong ka thain bad ia ka Ri. Ula pyntip ruh ba shen ka seng kan pynbna ia ka project ban pynduna ia ka drop out ne pep skul shiteng por ki khynnah skul hapoh ka thain.

Kane ka project kan long ka pilot project na ka bynta ban thain ia ki khynnah skul ban long kiba iaineh ha ka pule puthi bad ban thaw lad ba kin nym pep skul shuh tad haduh ba kin sngewthuh ia ka sap ka talent ba u Blei nongbuh nongthaw u ai ia ki ba kin trei ia ki kam lyngba ka jingstad jong ka juk digital ba mynta.