8 sngi ka Dorbar Mang Tyngka ka Jylla

Syllad | The Rising MeghalayaFebruary 2, 2024

Ka Dorbar Mang Tyngka jong ka ïingdorbar thaw aiñ ka jylla Meghalaya kan sdang naduh ka 16 tarik u Rymphang haduh ka 27  Tarik jong une u bnai.

Ha ka jingkren bad ki nongthoh khubor, u Lamphang ka ïingdorbar thaw aiñ ka jylla u Thomas A Sangma u la pyntip ba ka Business Advisory Committee ka dei kaba la dep ban ai jingbit na ka bynta kitei ki tarik halor kane ka dorbar mang tyngka.

U la ong ba ha ki phra sngi ki sngi longtrei san sngi yn shah ban ïakren halor ki mat ba ïadei bad ka sorkar bad lai sngi pat ki mat balah ban wanrah da ki MLA shimet.

Ka ïing kan sakhi halor ka jingkren jong u Lat ha ka sngi nyngkong bad ka namuna halor ka mang pisa na ka bynta u snem 2024-2025 ban wanrah da u Myntri Rangbah ka jylla kan urlong ha ka 21 tarik u Rymphang.

Na ka liang u Lamphang u la pynpaw ruh ba kane ka jingkhot kloi ïa ka dorbar mang tyngka ka dei na ka daw ka jingkyrkieh hapdeng ban sa don ka elekshon Lok Sabha.

“Hapdeng ba yn sa pynbna shen ïa ka elekshon, kumta ngi la hap ban pyndep shuwa kane ka dorbar mang tyngka”, la pynpaw u Lamphang ka ïing.