9 tylli ki takma khur ki nongsiat suloi ka Jylla na ka NE Zonal Shooting Championship

Syllad | The Rising MeghalayaAugust 26, 2019

JOWAI: Ki nongsiat suloi ka Shooting Association Meghalaya (SAM) kila ïoh khur mar 3 tylli ki takma ksiar, rupa bad rnong naka lympung ïakop siat suloi ka 7th NE Zonal Shooting Championship kaba la long ha 4th Assam Police Battalion, Shooting Ranges, Kahilipara, Guwahati, Assam naduh ka 19 tarik Nailar haduh 23 tarik Nailar 2019.

Ha kane ka lympung ki don haduh 242 ngut ki nongsiat suloi kiba la wan ban ïashimbynta ha kylleng ki jylla. Ka SAM kala phah 23 ngut ki nongsiat kynthup ïaki 9 ngut ki kynthei bad 14 ngut ki shynrang.

Ki nongsiat suloi ka jylla hapdeng ki jingeh baroh ki la lah ban khur takma bad hynñiew ngut ki nongiasiat kila pyni shisha ïaka sap kaba la ai mynsiem ïaka synjuk bad ka jylla ban kin ïoh ïashimbynta haka National Shooting Championship.

Kine ki 7 ngut ki nongsiat suloi ki dei ka Balarishisha Rani, Anjali Singh, Toiabha Mylliempdah, Shirley M. Kharbuli, Pynkhraw Kharshiing, Uttam Sinha bad u Dennyson Kyrsian.

La ïathuh ba kila ïoh poiñ kaba ki lah ban ïashimbynta haka Nationals Shooting Championship Competition (63rd NSCC) kaban long ha Bhopal ha u bnai November 2019.

Baroh kine ki 7 ngut kila khur ïaka takma ki kynthup ïaka Balarishisha Rani kaba la ïoh khur takma Ksiar haka 25M Sports pistol (Women Senior) kala ïoh ruh ïaka takma rnong ruh haka 10M Air pistol (Women Senior), ka Anjali Singh kala khur takma rnong haka 10 M Air Rifle, ka Toiabha Mylliempdah takma ksiar haka 25M Sports pistol (Women Junior), ka Shirley M. Kharbuli kala khur takma rupa haka 25M Sports pistol (Women Junior).

Na ki shynrang u Pynkhraw Kharshiing ula ioh khur takma rupa haka25M Center fire pistol (Men senior), Walsall M. Momin ula ioh takma rnong haka 25M Center fire pistol (Men senior), u Uttam Sinha takma rupa haka 10M Air rifle ( Men junior) bad u Dennyson Kyrsian ula khur takma ksiar haka 50M peep sight (Men Junior).

Da kane ka jingjop jong kine ki nongsiat suloi ka jylla, ka SAM ka don ka jingkyrmen ban pynkhreh khambha haka Meghalaya National Games 2022.