Ai dorkhas ka KSU sha u Lat ban dawa tuklar ia ki 6 ki mat ba sahteng kynthup ia ka ILP, ktien Khasi

Syllad | The Rising MeghalayaSeptember 25, 2024

Ka Khasi Students’ Union (KSU) ha ka 25 tarik Nailur ka la leit ban ai da ka dorkhas sha u Lat ka Jylla u CH Vijayashankar ban kyntu ia ka jingtuklar lem ka jong u na ka bynta ban pyntreikam noh mardor ia ka Inner Line Permit (ILP), ban pyndam noh ia ka Citizenship Amendment Act (CAA), ban pynrung ia ka Ktien Khasi ha ka 8th Schedule, bad pyllait noh ia ka Indo-Nepal Friendship Treaty, 1950, ban pynbeit ia kam iakajia khappud bad ban seng ia ka Central Agricultural University (CAU) kaba neh ha ka Jylla.

U General Secretary ka KSU u Donald V Thabah u la pynpaw ha ka dorkhas ia ki sienjam ba la shim da ka seng ban kyntu ia ka Sorkar Pdeng halor ka jingdonkam ban pyntreikam noh ia ka ILP ha Meghalaya. Hynrei, haduh mynta ka KSU bad ki paidbah kim pat shym la ioh satia ia kano kano ka jubab ka ban pynkmen na ka sorkar Pdeng bad kaba la pynlong ia baroh ba kin sngew bynniaw shibun.

“Kumta ngi kyrpad ia phi ba phin shimkhia lem khnang ban lah ban pyntreikam noh mardor ia ka ILP ha Meghalaya lyngba ka jingtuklar lem ka jong phi bad ka sorkar Pdeng,” u la ong.

Katkum ka jingpynpaw ka jong u, ka Meghalaya suki suki ka la kylla long kum ka Tripura bad ka Assam ha kaba ki jaidbynriew riewlum trai muluk ki la jan kylla rit paidbah na ka jingwan buhai jong ki briew kiba na bar.

Kumjuh haba dawa ban pyndam noh ia ka CAA 2019, namar ka jingplie lynti ban pdiang ia ki briew na ki ri ba marjan kum ki nongshong shnong, u samla Donald u la ong ba kane kan sa ktah jur ia ka jingdon jong ki paid nongshong shnong trai muluk hapoh ka Jylla.

U la ong ba mynta ka Meghalaya ka la dep sakhi lypa ia ka jingwan buhai shnong beain kaba jur naduh ba sdang ka thma pynlaitluid ka Bangladesh ha u snem 1971 haduh mynta, da kaba bynrap ba ka jingwan rung tuh jong ki poiwir na Bangladesh sha kane ka thain naduh u snem 1971 ka la pynmih ia kiba buntylli ki jingiakynad hapdeng ki trai shnong riewlum bad kine ki poiwir.

Nalor u la ong ruh ba ka KSU ka la kyrpad ruh ia u Lat ka Jylla ban iakren bad ka sorkar Pdeng na ka bynta ban pyllait noh ia ka Meghalaya na ka jingtreikam jong ka Indo-Nepal Friendship Treaty, 1950.

Une u nongialam ka KSU u la ong, “Kumba long ka CAA, ka Indo-Nepal Friendship Treaty 1950 ruh kaba plielad ia ki nongshong shnong ka Nepal ba kin ioh long nongshong shnong ka India khlem kino kino ki kyndon ka la ktah jur ia ka Meghalaya ha kiba bun ki bynta. Naduh ki snem 1980, ka Meghalaya ka la sakhi ia ka jingwan tuid jong ki Nepali hapoh ka Jylla kaba la buh ruh ka jingsyier ia ki riewlum rit paid ka Jylla bad kaba lam ruh sha ki jingiakynad hapdeng kine ki ar kynhun.Ki Nepali ki la wanrah jingeh ruh ha ki thain khappud ka Meghalaya da kaba tynjuh bor pyrshah ia trai muluk halor ka hok ka jong ki halor ki jaka puta bad ka Jylla.”

Haba khot ban ia pynbeit noh mardor ia ki kam iakajia pud bad ka Assam, u Samla Donald u la ong, “Ka KUS namar kata ka pan ia ka jingkdew lynti jong ki ar sorkar ban pynthikna ba ki jaka iakajia kiba hap hapoh u pud u sam jong ki Hima Khasi dei ban kynthup noh shapoh u pud u sam jong ka Meghalaya.”

Halor ka mat kaba iadei bad ka Ktien Khasi une u nongialam ka KSU u la ong ba ka jingkyrpad ban kynthup noh ia ka ktien Khasi ha ka khyrnit ba phra jong ka Riti Synshar Ri ka dei ka jingdawa kaba shonghok, kata ia kaba la rah hakhmat ka Sorkar India naduh ki snem 1960 da ka Khasi Author Society.

U pyntip ruh ba ka KSU ka la rah ia kane kajuh ka jingdawa naduh u snem 1992 ban pynrung noh ia ka ktien Khasi ha ka khyrnit ba phra. Kumjuh ka Sorkar Meghalaya ka la mynjur ruh ia ka Resolution kaba kyrpad ban pynrung noh ia ka ktien Khasi bad Garo ha ka khyrnit ba phra ha u snem 2018.

Ha kajuh ka por ka KSU ka kyrpad ruh ia u Lat ba un iakren bad pynthikna ba ki jingkular bad jingtyrwa ban wanrah ia ka Central Agricultural University ha Meghalaya kin urlong shisha.

Ha u 2010 ka sorkar Pdeng lyngba ka Ministry of Agriculture ka la mynjur ban wanrah ia ka Central Agricultural University ha Meghalaya ha ka jaka kaba ha ka jingheh kaba 200 akar ha Kyrdemkulai, Ri Bhoi district.

“Ha ka 16 tarik u Naitung 2019, ka KSU ka la thoh sha u Narendra Singh Tomar Myntri ka Ministry of Agriculture and Farmers’ Welfare ha kaba iadei bad kane ka mat, hynrei haduh mynta kam pat shym la ioh ia kano kano ka jubab,” ong u nongilam ka KSU.