Ai jinghikai bad hiar shim jingkhein ka CIPMC Shillong ban iada ia u kba na ki khniang ha Jowai

Syllad | The Rising MeghalayaOctober 14, 2022

Ka Central Integrated Pest Management Centre (CIPMC), kaba hap haka Ministry of Agriculture & Farmers Welfare, Directorate Plant Protection, Quarantine & Storage kala pynlong iaka jingai jinghikai kaba ar sngi iaki nongrep ha rilum Jaintia ban iada ia u jyntang bad u soh kba haki lyngkha ha Jowai.

Kane ka jingai jinghikai kala sdang haka sngi Palei bad kut haka sngi Thohdieng. Ha kane ka jingai jinghikai nalor ba pyni ha pyrda la ialam ruh sha ki lyngkha iaki nongrep kiba don haduh 40 ngut kumno ban iada ia u jyntang bad u kba ha ki lyngba na ki khniang kiba wan hiar thma ia u jingthung kaba wanrah ka jingduh nong kaba khraw iaki paid nongrep.

Ia kane ka jingai jinghikai la pynlong ha jaka ai jinghikai ka ophis u District Agriculture Officer, West Jaintia Hills District. Kane ka training la tip kum ka “HRD-Orientation Training Programme for Farmer on Integrated Pest Management in Paddy Cultivation”.

Ha kane ka jingai jinghikai la iadonlang u District Agriculture Officer, EMH nalor ki riewshemphang Central Integrated Pest Management Centre (CIPMC), Shillong kiba kynthup ia Plant Protection Officer (PPO), Gokulraam M, u Dr. Devaraja KP (APPO), ka kong Aroti Hazaeika (APPO). Ia ka jingialang la pyniaid da u ma S Syngkon Agriculture Development Officer.

Ka thong jong kane ka training ka dei ba ki nongrep kin ioh jinghikai, ban tip ia ka Integrated Pest Management (IPM) kila lad ban iada na ki khiang kiba pynjulor bad kiba iarap pynheh pynsan iaki jingthung ne u kba ha pyntha kba. Kine ki khniang kiba pynsniew iaki jingthung ki dei kiba la tip kum Yellow Stem Borer, Leaf Folder, Gundi Bug, Rice Blast, Rice Leaf Spot & Udbatta Disease. Baroh kine ki khniang ki dei kiba pynsniew ia u jyntang kba bad u soh kba da kaba sam thliew iaki sla, kiba pynsong iaki sla, pynsiew iaki symboh bad kiwei kiwei.

Ha ka jingkren plie ia kane ka training, U District Agriculture Officer, EMH Passah u la kyntu ia ki nongrep ban pyndonkam hok iaki jinghikai kaba kila ioh na kane ka jingai jinghikai ka CIPMC khnang ban myntoi haka rep ka riang.

Ha kane ka sngi la pynlong ruh ia ka jingleit jurip sha ki pynthor ki hali, ha ki them jong ka Wah Myntdu ha Syntu Ksiar ban shim jingkhein kaba la tip kum ka Agro Ecosystem Analysis ha kaba la phiah ia ki nongrep ha ki 4 kynhun na ka bynta ka leh ia ka jingjurip ia ki jait khiang ki ba pynjulor bad ki khiang kiba ai jingiada ia u kba.

Haba kren bad u Plant Protection Officer (PPO), Gokulraam M, u la ong ba la leh iakane ka jingjurip da ki nongrep kan long ba ki nongrep kin lah ban shim ia kano kano ka rai ha kaba ia dei kumno ban iada ia u kba ha pynthor hali kat kum ka jinglong ka suin bneng, ka jaka ne kyndew, ka jinglong jingman jong ka um bad ki jait khniang. Ki nongrep dalade hi ki hap ban leh ia kane sha pynthor khnang ban tip bad ban shim jingkhein bad pynkreh ia ki jingthoh kaba ki shem ha ka jingrip jong ki.