Ai jinghikai ka CIT Amlarem iaki samla ban pyntbit iaka sap ha Padu Bah

Syllad | The Rising MeghalayaSeptember 14, 2022

Ka Community Institute of Technology (CIT) Amlarem Centre ryngkat ka jingkyrshan bad trei lang ka Meghalaya State Skills Development Society, Sorkar Meghalaya haka sngi Nyngkong ka la pynlong ia ka Awareness Programme cum Mobilisation Drive hapoh ka shnong Padu Bah na ka bynta ban ai jingpynshai halor ki jait training bapher bapher kiba la kyrshan da ka Meghalaya State Skill Development Society lyngba ka Skills Meghalaya.

Ha kane prokram la ioh ka jingkren na u Skill Development Officer, MSSDS , Ma Lambormi Suchen, U ba la kren pynshai shaphang ka Skills Meghalaya Project jong ka Sorkar Meghalaya bad ia ki jait training kiba lah ban ioh lyngba ka Skills Meghalaya Programme kiba iadei na ka bynta ki khynnah samla kiba don ka jingthmu ban seng kam lajong ynda ki lah dep pyntbit ialade lyngba ki Skill Training.

La ruh iaka jingkren na u Rangbah Shnong ka Padu Bah u Ma Neta Pohthmi u ba la ai ka jingkren bad kyntu ia ki khynnah samla kynthei bad shynrang ban wan shakhmat na ka bynta ban shim ka kabu ba ka sorkar ka la wanrah shaduh ki shnong bad ki thain jong ka Amlarem ha kaba iadei bad ki jait training bapher bapher.

Shuh shuh la ioh ka jingpynbna da ki project team ba ka CIT ka offer ia ka trade Tailoring hapoh ka Amlarem Centre khlem don kam siew ei ei bad ka por jong ka training ka long 3 bnai bad ia ka training yn pynlong naduh ka sngi Nyngkong haduh Thohdieng.

Ha kane ka sngi  ki paidbah  khamtam ki longkmie ki la ia wan shim bynta shitrhem sha kane programme bad ka don ruh ka jingiakren bad iamir jingmut ha ka ba dei bad ki jait hikai (training) bad ka iohkam iohjam hapdeng ki paidbah. Ha kane ka sngi ruh la pynrung kyrteng ia ki khynnah samla hapoh ka shnong ki ba don ka jingthmu bad jingthrang ban jied shisha ban pyntbit ialde ia ka training ha ka Tailoring  hapoh CIT Amlarem Centre.