Ai jinghikai ka RBI halor ki lad jingiarap pisa lyngba ki bank na ka bynta ki nongseng kam lajong ha Thangbuli

Syllad | The Rising MeghalayaSeptember 23, 2023

Ha ka jingpyrshang ban pyniasoh bad ki nongseng kam lajong kiba rit, ka Reserve Bank of India (RBI) Shillong hynnin ka sngi Thohdieng ka la pynlong da ka jingialang aijinghikai halor ki lad jingiarap pisa lyngba ki bank sha ki nongseng kam lajong ha ka jingialang kaba la long ha ka shnong Thangbuli, Amlarem, West Jaintia Hills District hapoh ka jingpyniaid jong u Navneet Singh Nagar, Deputy General Manager ka RBI Shillong.

Ha kane ka jingialang ba la wan iashim bynta ki riew pawkhmat bapher bapher kynthup ia ki kynhun kiba don bynta.

Haba kren ha ka jingialang u Navneet Singh Nagar u la pynpaw halor ka jingdonkam ban pynlong ia kiba kum kine ki jingialang hapoh ki thain ki bym ioh ia ki lad jingshakri lyngba ki bank hapdeng ki nongseng kam lajong ha kiba kum kine ki jaka khnang ba kin tip ha kaba iadei bad ki lad jingiarap lyngba ki bank.

Ka jingthmu ba kongsan jong kane ka prokram ka long ban aijingtip sha kine ki nongseng kam kiba don ha kito ki jaka ba kin ioh ia ki lad ban pynpaw ia ki jingeh ki jong ki ha kaba iadei bad ki lad jingiarap pisa na ki bank bad ban pynshlur ruh lyngba ki artylli ki bynta jong ka jingiakren hapdeng ki kynhun kiba ia don bynta.

U la ong ruh ba kum kine ki jingialang kilong kiba donkam na ka bynta ka Reserve Bank ba kan ioh ban pynsngap ia ki jingai jingmut, ki jingsngew, ki jingsngewkhia bad ki jingsyier hapdeng ki nongseng kam lajong, kata da ka jingthmu ban shim ia ki lad ki lynti ban kynthup ia ki ha ki banking system lyngba ki lad pyniasoh ne credit lingkage. Kane ka jingialang ka thmu ban ia ki ar bynta ki lynti iamir jingmut hapdeng ki kynhun bei tyngka bad nongseng kam lajong. 

Na ka liang u Kong DV Lyngdoh, ADC, G Sarma, Regional Manager ka SBI bad u Deepak Singha Roy, Regional Manager of MRB ruh ki la aijingkren ha kane ka jingialang da kaba pynshlur ia ki nongseng kam lajong lyngba ki jingioh jingmut na kane ka prokram.

Kumjuh ki nongmihkhmat na ki bank bad kiwei pat ki jaka kynshew pisa ruh ki la pynshai halor kiba bun ki lad ki lynti kiba thmu na ka bynta ban iarap ia ki nongseng lam lajong ha ka jylla.

Na ka liang ki heh jong ka Meghalaya Basin Management Agency ruh ki la pynshai halor ki sienjam ba la shim da ka sorkar ha kaba iadei bad kane ka bynta hapoh ka jylla. Na ka liang ka Integrated Village Cooperative Societies (IVCS) Sohphoh ia kaba la ithuh kum ka kynhun ne Cluster hapoh ka Sfurti Scheme jong ka sorkar  India ruh ka la pynpaw halor ka khana jingjop ha ka jingiaid lynti kum ka kynhun.

Ka Kong Trinity Saioo, ka nongioh pdiang khusnam Padma Shri ruh ka la iashim bynta lang bad pynpaw ruh halor ka jingiaid lynti jong ban kyntiew ia ka kam shalan ia u shynrai ba la tip kum u ‘Lakadong Turmeric’ sha baroh ki bynta jong ka ri India bad shabar kumjuh.Kiba bun kiwei ruh ki nongseng kam lajong ki la pynpaw ia la ki jong ki khana jingjop ha kane ka jingialang.

Shuh shuh ha kane ka prokram ki la don ruh katto katne ngut ki nongseng kam lajong kiba la ioh pdiang ia ka shithi ban ioh ram ne loan.