Ai jinghikai ka Rotaract Club Pine City iaka jingpoi bnai ki kynthei ban iada iaka jingktah ha Chyrmang Wah

Syllad | The Rising MeghalayaNovember 28, 2021

Ka Rotaract Club of Pine City Shillong haka sngi Saitjain kala wan ban pynlong iaka jinghikai halor ka koit ka khiah ki kynthei haka shnong Chyrmang Wah, West Jaintia Hills District.

Ka jingthmu jong kane ka jingai jinghikai kalong ban pynsngewthuh iaki kynthei kiba dang ki dang san kumjuh kiba samla halor ka koit ka khiah bad kumno ban iada ban lait ban shah ktah na ka jingpang jingshitom. Kane ka jingai jinghikai kadei halor ka ‘Menstrual Health’ ne ka jingpoi bnai ban pynshlur iaki kynthei naduh ki khynnah haduh ki samla.

Ki riew shemphang kiba la wan na ka tnad jong ka koit ka khiah kiba kynthup ia u Dr. S. Nartiang, In charge Iooksi, PHC, Laskein Block uba la kren bad batai halor ka phang ‘Menstrual Health’ bad ka Samla Jane Rymbai, Adolescence Counsellor Civil Hospital Ialong kaba la kren halor ka phang ‘Teenager Pregnancy’ bad kumjuh ruh laioh ki kyntien ai mynsiem ia ki longkmie bad ki samla na u CA Ram Kyndiah, Secretary RAC of Pine City Shillong.

U Waheh Shnong Chyrmang Wah Sholin Shylla ula ai iaka jingkren pdiang, katba u Skemjingmut Law, Adviser RAC Pine City Shillong u la pashat ki kyntien  maitphang shaphang ka club  Rotaract Club of Pine City, Shillong.

Shuh shuh ha kane ka sngi ladon ruh ka Free Eye Check-up ba la pynkhreh da ka jingiatreilang hapdeng ka Rotaract Club of Pine City Shillong ryngkat ka Bansara Eye Care ba la mihkhmat da ka Rishai Sutnga, Optometrist Bansara Eye Care bad ruh ka jingsam ia ki Sanitary Pad sha ki longkmie bad khun samla kynthei bawan iashimbynta ha kane ka prokram.

Shuwa ban sdang ka jingai jinghikai la rwai iaka jingrwai National Anthem ka Ri.