Ai jinghikai ka SSA halor ka RTE ha Jowai

Syllad | The Rising MeghalayaApril 16, 2021

Ban pynïoh ïaka jingnang jingstad kaba salonsar ia baroh ki khynnah katkum ka RTE Act 2009, ka Sarva Shiksha Abhiyan West Jaintia Hills District kala pynlong ïaka Orientation Programme kyrpang na bynta ki kmie ki kpa bad ki bor pynïaid jong ki skul.

Ïa kane jingai jinghikai la pynlong ha Community Hall ka Loomsooiung Newhill, Jowai haka 15 tarik bad 16 tarik Ïaiong haka jingïadonlang ki riew shemphang jong ka Sarva Shiksha Abhiyan.

U L.K. Singh, IE Coordinator, SSA West Jaintia Hills, ula batai pynsngewthuh ïaki kmie ki kpa shaphang ka MBOSE Guidelines kaba ïadei bad ka hok ki khynnah ba don jingduna haki dkhot met.

Ka Monica Dkhar IE Block Resource Teacher Laskein ka la batai shaphang ka Hearing Impaired ne ki khynnah kiba don jingduna haka bor ïohsngew bad ka C.R. Rynjah IE Block Resource Teacher, Amlarem ka la batai shaphang ka Intellectual Disability.

Haka sngi ba bud la ai jingai jinghikai kyrpang ïaki Principal, ki Head Teacher ha kaba ki riew shemphang ba ïaka Merilang Kharbyngar, State Coordinator, IE SSA-SEMAM Shillong ka la batai bniah haba ïadei bad ki khynnah ba don jingduna haka met ka phat katba ka Esther J.E.Shongwan, Deputy Chief Academic Officer, MBOSE ka la pynsngewthuh ïaki nonghikai halor ki rukom thoh Examination MBOSE jong ki khynnah kiba don hapdeng ka jingduna.

U LK Singh District Coordinator IE SSA West Jaintia Hills haka jingkren ula kyrpad ïaki nonghikai bad ki kmie ki kpa ban ïatreilang ryngkat ryngkat na bynta ka hok bad jingmyntoi jong ki khynnah kiba donkam ban ïoh jingïarap naduh na ïing na sem, ha skul bad haka imlang sahlang.