Ai jinghikai ka SURE ha Moosakhia halor rep ka riang bad kam ri jingri

Syllad | The Rising MeghalayaMarch 26, 2019

MOOSAKHIA: Ka Society for Urban and Rural Empowerment (SURE) kala pynlong ïaka training kaba shibnai lynter halor ki rukom rep bad rukom ri jingri ba bunjait hakajuh ka jaka. Ïa kane ka training kaba shibnai lynter la pynlong ha ka shnong Moosakhia kaba don hapoh ka Amlarem Sub Divsion jong ka West Jaiñtia Hills.

Ïa kane ka training la plie pyndonburom daka kong B.M. Majaw kaba long ka District Horticulture Officer (DHO) jong ka West Jaiñtia Hills haka 25 tarik jong u Lber haka jingïadonlang ki nongïalam ka SURE, u Waheh Chnong bad ki nongïalam shnong.

Haka jingkren lamkhmat jong u, u H.H.Mohrmen ula batai ba kane ka training ka dei kaba la kyrshan da ka Meghalaya State Skill Development Society (MSSDS) halor ka projek Supporting Human Capital Development in Meghalaya Package #21 Under SFC. Kane ka Training ka dei halor ka Integrated Farming (Small Farmers) kaba hikai ïa ki rukom rep bad rukom ri jingri naka bynta ki nongrep ki bym da don eh ka jaka kaba heh.

Ha kajuh ka por kane ka projek ka ïarap ruh ha kaba ïa dei bad kaban pynïaid ïew ïa ki mar rep bad kumjuh ruh ban shna ne pynmih ki kynja jingbam na ki jingrep kiba ki nongrep ki pynmih. U Mohrmen ula ong ruh ba ha kane ka training nalor kaba hikai ïa ki rukom rep babun jait bad ki rukom ri jingri, yn hikai ruh ïa ki rukom shna sboh, shna dawai khniang, ri ngap bad wat ban rep tit ruh.

Ka kong B.M. Majaw haka jingkren jong ka ka kyntu ïa ki nongrep kiba bun ruh na ki, ki dei ki samla bad kin shim khia ïa kaei kaba la ai training ïa ki bad ban pyndonkam pat ïa ki. I pynkynmaw ruh ba ha kane ka pyrthei kyrduh kam, ki samla kila dei ban khmied sha ka kam rep ne ka kam ri jingri kum ka lad ïohkam ïahjam. Ila pynkynmaw ruh ïa ki nongrep ban a ka liang jong ka sorkar kala sangeh ban ai ki sboh dawaiphniang sha ki nongrep, kumta ila kyntu ruh ïa ki ba kin pyndonkam da ki sboh khlem dawai bad ban sdang ruh da ka rukom rep Organic namar ka ïew mynta ka dawa ïa kine ki jait jhur.

Ïa ka jingïalang la pynïaid da u Habandajop Lyngdoh uba long uwei na ki nongai training bad ha kane ka sngi la ïoh ruh ïa ka jingkren na u Waheh Chnong ka shnong Moosakhia u ma Ribiang Paksang bad u Ma Realsing Muksor.