Ai jinghikai ka SURE pyrshah ïaki jingdih buaid ha Nongtalang college

Syllad | The Rising MeghalayaSeptember 21, 2021

Ka Society for Urban and Rural Empowerment (SURE) ha ryngkat ka jingïatreilang bad ka jingkyrshan ka ophis jong ka District Social Welfare Officer West Jañtia Hills haka sngi ba ar kala pynlong iaka jingai jinghikai ïa ki khynnah jong Nongtalang College halor ka jingsniew bad kumno ban kiar naki kynja jingdih buaid kiba la kynrei ha kane ka distrik.

Hashwa ban sdang ïa kane ka jingai jinghikai la ïoh ïa ka jingïalang kaba lyngkot ïa kane la pynïaid da u Firstborn Myrchiang uba long u Head Department ka EVS department ka Nongtalang College.

La ïoh ïa ka jingkren na u Secretary jong ka SURE u HH Mohrmen uba la ïathuh ïaka jingïalang ba ka West Jañtia hills distrik ka dei kawei na ki districk hapoh ka ri baroh kawei kiba la shahktah bha ha ka jingbun jong kiba kyrni ha ka jingdihbuaid bad dei namar kata ka sorkar kala jied ban pynlong ïaka ‘Nasha Mukt Campaign’ ha kane ka distrik.

Ula ong ruh ba ka jingma kaba ar kaba ïabud ryngkhi bad ka jingkyrni haki jingdihbuaid ka dei ka jingbun jong ki briew kiba ïoh ïa ka jingpang HIV/AIDS kaba lah ban mih na ka jingpyndonkam ïa ki tiar injek haba dih ïa ka drok. Ne na ka jingïashongkha klumar khlem kano kano ka jingïada khamtam ha ka por ba ki briew ki buaid.

Ïa ka jingai jinghikai ïa ki samla pule jong kane ka skulbah shaphang ka jingma jong ka jingkyrni ïa ki kynja jingdih buaid kaba kynthup ïa ka kiad la ai da ka kong Dakapaïa Bareh Field Coordinator ka SURE. Ka Kong Dakapaia kadei ka briew kaba la don shibun ki jingtip bad kala trei bad ki briew kiba ngop haka jingdih iaki kynja pynbuiad.

Hadien ka jingai jinghikai, ki samla pule ki nonghikai kiba la bun ki jingkylli ha kaba iadei bad ki lad jingiada bad ban kiar na ki kynja jingdih pynbuaid.

U Ajay Kumar Adhikari uba long u Head department jong ka subjek Political Science ha kane ka College ula ai iaka kyntien ai khublei.