Ai jinghikai ka tnad kam rep ka West Jaiñtia ban ïada ïaki khniang ba hiar thma ïa u Riewhadem

Syllad | The Rising MeghalayaMay 27, 2019

JOWAI: Ka tnad kam rep kamriang ka West Jaiñtia Hills District kala ai jinghikai ïaki paid nongrep ban ïakhun pyrshah ïa u Niangkhung uba la tip kum u Fall Army Worm haka shnong Khanduli, ka shnong kaba don ha khappud kaba don bun ki nongrep riewhadem.

Ïa kane ka jingai jinghikai la pynlong da ka jingïatreilang ka ophis u District Agriculture Office, Agriculture Technology Management Agency (ATMA) bad ka Krishi Vigyan Kendra, Jaintia Hills; West Jaintia Hills District haka 22 tarik u Jymmang. Ïa kane ka jingai jinghikai la pynlong hadien ka jingshah hiar thma ki jaka rep Riewhadem ha District ha une u khniang.

Kane ka jingai jinghikai dei kaba la tip kum ka “Scientific Management on Fall Armyworm in Maize Production”.

Dr. DM Firake, Senior Scientist (Entomology), ICAR, NEHR uba long u riew shemphang ula batai ïaki lad jingiada na une u khniang. La ong ba dei ban thung ïa u riewhadem haka pork aba biang bad ym dei ban thung slem bad dei haba thung dei ban thung haka juh ka por.

Haba thung ïa u riew hadem dei ban tih kham jylliew ïaka lyngkha khnang ban iada na ki khniang bad dei ban thung lang ïa u riewhadem bad kiwei pat ki jingthung. Lada lap ïaki ksain kiba sop ha u jingthung dei ba pynjulor ïaki da kaba pdem haka umphniang sharak.

Ha kane ka jingai jinghikai la hikai kumno ban ïakhun ïaki khniang Niangkhung bad la pyni ruh ïaki nongrep kumno ban thung bad ki lad jingiada ïa u riewhadem. La kyntu ruh iaki nongrep ba lada lap ïa une u khniang dei ban pyntip mar mar sha ki ophisar ka tnad kam rep kam riang.

Ha kane ka jingai jinghikai la wan ban ïashimbynta da ki 149 ngut ki nongrep ka thain.