Ai jinghikai ka tnad Social Forestry halor ka jingim u briew bad ka mariang ha Shangpung

Syllad | The Rising MeghalayaApril 6, 2023

Ka ophis u Range Forest Officer, Social Forestry Range, Shangpung ka la pynlong ïaka Awareness Programme halor ka Lifestyle for Environment (LIFE) ne ka rukom im ryngkat bad ki sawdong sawkun ka mariang.

Ïaka jingïalang la pynlong ha Rev. Anthony Crocket Memorial Hall Shangpung Mission haka sngi Palei. Ka mat pdeng kane ka jingai jinghikai kalong “Our Endeavour Today is for a better Tomorrow” ne ka jingpyrshang ban pynbha mynta na ka bynta ka jingbha ka lashai.

Ïa kane ka phang la ai jingbatai da u riew shemphang u Ma LD Suïam Assistant Engineer, Jowai Rural Distribution Division, MePDCL, Jowai haka jingïalang kaba la pynïaid da u MC. Suchiang Forestar-1 haka jingdonlang ki khynnah skul kiba la pyndep ïaka eksamin matrik, ki Village Organization ka Shangpung Mission bad u Waheh shnong ka Shangpung Mission u RN Suchiang.

U Ma LD Suïam kum u riew shemphang haka jingbatai ula ong, ba dei ki briew hi kiba pynjot ïaka mariang bad dei ki briew hi ruh ki ban shim ïaka jingkitkhlieh ban pynbha ïaka.

Ula ong ka jingshah lehbeiñ ka mei mariang ka la long shaba palat bad ïa kane la sakhi ruh ba bun na ki um, ki wah bad ki wahduid hynrei mynta pat bun na kitei ki wahduid bad ki wah rit, ki la jah lut bad kane hi kan sa poi ba ki briew kin nym ïoh shuh wat ban dih um.

Ula la kyntu ïaki khynnah skul khamtam kiba long ka lawei ka shnong ka thaw ban pynïajan ïalade bad ka mariang khnang ban sngewthuh khambha ïaka jingkordor jong ka bad ban long ki nongpynsaphriang ïaka khubor sha kiwei pat.

Ula pynkynnmaw ruh ïaka jingïalang jong ki ri ka pyrthei kaba ki khot ka United Furom on Climate Change Conference ha u snem 1994 kaba la shim bynta da ki 198 tylli ki ri jong ka pyrthei kaba la tip ruh kum ka Conference of the Parties (COP). Ula ong ka jingthmu jong ka jingïalang ka long ban ïada lane tehlakam ïaka jingmushlia jong u briew ïaka mariang kaba lah ban wanrah ka jingma ïaka mei mariang kumjuh ka jingma na ka jingkiew ka jingshit ne Global Warming.

Ula ong hashwa ka jingsdang ki Industrial Revolution, kane ka mariang kaba la buh ryntih U Blei ñiar ban shem ïaki jingjia kiba sngewsih na ka jingpynjot jong ka mariang hynrei suki suki hadien ka jingwanrah ïaki karkhana bapher bapher kane ka mariang ka la sdang ban leh thlia bad la shem ba shibun ki jingjia kiba sngewsih bad shyrkhei kiba pynjot ïaka mariang bad don ruh ka jingduh ïaki jingtei bad ki mynsiem briew.

Nalorkata ula ong haka jingïalang kaba la long ha ri Brazil ki 196 tylli ki ri jong ka pyrthei ki shim ïala jingïakut na bynta ban tehlakam ïaka jingshit bad jingkylla ka suiñbneng bad kawei na ki jingïakut ba la shim ka long ban pynroi ïa baroh ki jait khlaw haka pyrthei.

Shuh shuh haka jingïalang kaba la long ha ri Japan la shim ïaki katto katne ki jingïakut kata ban pynduna ïaka jingpynmih tdem na ki karkhana kiba long ki jingsniew ïaka mariang kaba ki khot ka Greenhouse gases. Ula ha katei ka jingïalang ki 37 tylli ki ri kiba la kiew haka ïoh ka kot ki shim ïaka jingïakut ban pynhiar ïaka jingshit haka pyrthei la kumno kumno da 1 degree centigrade.

Nalorkata, la ïakut ruh ban mang tyngka ban tehlakam ïaka jingshit bad jingkylla ka suiñbneng (Global warming & climate change) kiba ktah ïaki jingthaw ba don jingim ha bun ki liang khamtam haka bam bad ka jingheh jingsan ryntih.

Ha u snem 2015 lyngba kane hi ka Conference kaba ki khot ka COP-21 kaba la long ha France ka la shim ïaka jingïakut ba ka jingshit jong ka pyrthei kamdei ban kiew palat ïaka 2 degree centigrade.

Ula ong ka Climate change ne ka jingkylla jong ka suiñbneng kadei ka jingma kaba khraw kaba ap ïaki nongshong shnong bad ula kyntu ïa ki Village Organization bad khynnah skul ban kiar na ka jingpynjot ïaka mariang bad kyntu ban snohkti lang bad ki dorbar dong dorbar shnong ban pynurlong ïaka jingthmu ba bha ban tehlakam ïaka jingpynjot ïaka mariang.