Ai jinghikai ka VDP Nongspung halor ka jingktah ki jingdih pynbuaid bad shongkha khynnah

Syllad | The Rising MeghalayaJune 1, 2019

NONGSPUNG:  Ka Village Defence Party (VDP), Nongspung hapoh ka jingialam u Bah Melanding Syiemlieh President VDP Nongspung bad u Bah Rojimstar Syiemlieh Secretary VDP Nongspung ha ka jingiatreilang jong ka Seng Samla, Seng Longkmie ka shnong Nongspung bad ki samla pule na ka Social Work Department ka Martin Luther Christian University u Jymmang 29 kala pynlong ia ka prokram ai jinghikai halor ka jinglehkhuid, ka jingjyllei ki jingdih kiba pynbuaid, ka jingshongkha khynnah bad ka kam thombor ïaki kynthei khynnah.

Haba kren ha ka jingialang u Bah Kyntiew Syiemiong Secretary ka shnong Nongspung u la ong ba ka jinglehkhuid ka long kaba donkam haduh katta katta  kum  ka imlang sahlang ban jinglait na ki jingpang ba bun jait  namar ki jingjaboh. Dei ban kiar na ka jingbret pathar ia ki jaboh kum ki plastik bad kiwei kiwei kiba tuid ha ki nala, ki wah, ha ki lynti syngkien bad ban don ka jingkitkhlieh ban pynlong ia ka imlang sahlang kaba khuid ha baroh ki liang da kaba sdang na la ki rympei iing.

U Bah F Dkhar na ka Manbha Foundation u la kren halor ka jingshahktah kito kiba lah kyrni ha ki jingdih kiba pynbuaid kum ka kyiad, u drok bad kiwei kiwei kiba buh  jingeh ia ki  ban bthat ne  lait na kum kita ki  jingkyrni kiba  ktah ia ka koit ka khiah, ka pyrkhat pyrdain , shongsuk shongsain ha iing ha sem bad ha  ka imlang sahlang. Ka long kaba donkam ba kum ka imlang sahlang khamtam ki samla ban kiar na kitei ki kynja jingdih namar ba shisien ba lah kyrni ka shem shitom ban lait na ki.

U Bah A Shanpru uba mihkhmat na ka Sohiong Police Outpost u kren halor ka shongkha khynnah kiba khlem pat dei ka rta  ba ka don ka aiñ kaba teh ia kito kiba shongkha khynnah. U pynkynmaw ba ki kynthei ki dei ban kynjoh 18 snem bad ki shynrang 21snem ka rta ban shongkha shongman. Ka shongkha khynnah ka wanrah ia ka jingkulmar, jingiapher jingmut shiteng por, ka jingduh ia ka jingpule, ka jingktah ia ka koit ka khiah jong ki bad ia ka lawei ka jaidbynriew namar ki khynnah skul bad samla pule ki dei ki lawei jong ka imlang sahlang. U pynpaw ruh ïa ka jingshah ktah ki khynnah kiba ngat ha ka jingshah thombor ka ktah ïaka pyrkhat pyrdaiñ jong ki. U pynkynmaw ruh ka jingthombor iaki khynnah kynthei kiba khlem pat dei ka rta ban shongkha kin hap ka jingshah pynshitom ha ka aiñ Protection of Children from Sexual Offences (POCSO) Act, 2012.

U Bah Rojimstar Syiemlieh uba pyniaid ia ka jingialang ha katei ka sngi u la kyntu ia ki paidbah nongshong shnong ka thain ban shimkhia bad pylleit jingmut halor kitei ki jingai jingmut kiba pher bapher ki ban tei ia ka imlang sahlang ha ka jingim briew na bynta ka jingshngain, ka jingkiew shaphrang bad shibun ki jingmyntoi.