Ai jinghikai ka VDP ryngkat ka jingiatreilang ka Jowai PS ban iakhun iaka jingshongkha khynnah, POCSO bad kiwei

Syllad | The Rising MeghalayaSeptember 16, 2023

Ka Village Defence Party (VDP) Iongnoh ha ryngkat ka jingiatreilang bad ka Jowai Police Station kila pynlong iaka jingai jinghikai ban iakhun pyrshah iaka jingshongkha khynnah, ka jingiada iaki khynnah na ka jingshah thombor bad shah lehbein ne ka POCSO Act, Cyber Crime, ka jingiakhun pyrshah ia u drok bad kiwei kiwei kiba la ktah haka imlang ka sahlang mynta.

Ia kane ka jingai jinghikai la pynlong ha iing dorbar jong ka shnong Iongnoh.

U Circle Inspector uba long ruh u officer incharge ka Jowai Police Station Ma Sunday Manner, OC Women’s PS kong I Kharpran, DCPO S Passah, Waheh Shnong Iongnoh Hoping Bang, VDP Secretary ma Manchwa Khlem bad kiwei kiwei.

Ha kane ka jingialang pynsngewthuh la wan iashim bynta lang ruh da ki khynnah ka skul SSA UP School bad Presbyterian UP School Iongnoh, ki kmie ki kpa jong k khynnah skul bad ki riew rangbah ka shnong.

Ki la batai ba ka aiñ Protection of Children from Sexual Offences (POCSO)- kaba ai jingiada ia baroh ki khynnah kynthei bad shynrang ba hapoh 18 snem rta na ka jingshah lehbein kum ka jingleh khlem akor, leh beijot bad kiwei kiwei ki kam kiba iadei bad ka met ka phad jong ki bad ki kyndon ban pynshitom ïaki nonglehkam sniew.

Ha kaba iadei bad ka Cyber Crimes bad Security- kaba iadei bad ka jingshah thok shah shukor lyngba ka internet bad ka jingshngain jong ka. La kyntu ia ki khynnah kumjuh iaki kmie ki kpa ban da peit thuh bad ban long kiba husiar bad adkar haba pyndonkam iaki mobile phone, computer ban lait na ka jingshah pynbiej, ne shah phon shah pah ha ki riew shimkabu bad ban kiar na ka jingsam iaki OTP, PIN, number account bad kiwei kiwei ha ki briew kiba ym ithuh bad kiba shu phone ban pynbiej ba ioh iaki jingai sngewbha ne ka pisa.

La pynsngewthuh ruh iaki khynnah iaka jingktah ka jingshongkha khynnah. La kyntu iaki khynnah ban kiar jingshongkha khynnah ban lait na ki jingklumar haka jingmut jingpyrkhat, ka jingduh lad ban pule puthi bad kaba ktah iaka koit ka khiah jong u/ka khynnah.

La hikai ruh halor kumno ban iakhun pyrshah iaka jingsniew u drok bad kiwei kiwei ki jingdih pynbuaid kiba ktah ialade shimet bad iaka imlang ka sahlang.