Ai jinghikai shna sboh khlem khleh dawai ka SURE ha Ialong bad Nongjngi

Syllad | The Rising MeghalayaNovember 20, 2020

Ka Society for urban and Rural Empowerment (SURE) kala pynlong iaka jingai jinghikai kaba shisngi ia ki nongrep ka shnong Ialong bad ka Lumtrep Nongjngi ban shna sboh khlem da khleh kino kino ki jait dawai hynrei tang lyngba ki jingthung jingtep bad ki jyntang jingthung.

Iaka jinghikai ha Ialong la pynlong haka 14 tarik une u bnai, katba ha Lumtrep Nongjngi la pynlong haka 17 tarik une u bnai.  Baroh ar tylli kine ki shnong ki dei kiba hap hapoh ka Thadlaskein C&RD Block.

Ha Ialong la wan ban iashimbynta da ki Women SHG haduh 20 tylli ki SHG.

Iaka jingialang ha kane ka jinghikai la pyniaid da ka Premri Pale. La ioh jingiakren ruh na ka president Village Organization Ialong kong Sngi Dhar kaba la iathuh bala dap shisnem ka VO Ialong bad kane ka jingai jinghikai ka SURE kala pynmyntoi iaki paid nongrep.

U Habandajop Lyngdoh uba na ka SURE ula ai khublei iaka kong J Synnah, District Social Welfare Officer kaba la ai jingkyrshan ia kane ka jingai jinghikai iaki SHG ban shna sbohwieh, sboh phlang, sboh khyndew, sboh 18 sngi, jingriam khniang, um sboh jhur, dawai kymbat khniang, rep rynsan, rep tit bad kiwei kiwei

Ha ka jingai jinghikai ha Lumtrep la pyniaid iaka jingialang da u Ebormi Pale waheh shnong haka jingiadonlang J Synnah, District Social Welfare Officer, ki nongtrei ka SURE bad kiwei kiwei.

Ka kong Synnah haba kren kala iaroh iaka SURE kaba la treishitom ban iarap iaki paid nongrep da kaba ai jinghikai ban rep kiba iadei bad ka mariang bad kala batai ruh ia shibun ki scheme ka tnad Social Welfare ka iarap iaki tymmen, ki khynnah, ki kynthei ba shah leh thombor bad kiwei kiwei.