Ai jingiada ka shnong Lumwahniai iaki dohkha dohpnat ha wah Rymben

Syllad | The Rising MeghalayaOctober 11, 2023

Ki nongshong shnong jong ka shnong Lumwahniai, East Khasi Hills District ki la shim iaka sienjam kaba kongsan lyngba ka jingplie ia ka jaka ban sumar ia ki dohkha dohpnat ne ka Fish Conservation Zone (FCZ) program ha ka jingialang kaba la long ha ka  7 tarik une u bnai bnai.

Lyngba ka jingkyrshan  jong ka Critical Ecosystem Partnership Fund (CEPF),  ki nongshong shnong jong kane ka shnong ki la ioh ia ka jingjop ha kaba iadei bad ka jingiashim bynta ban aijingiada ia ki dohum dohwah bad ka mei mariang.

Ka thong ba kongsan jong ki nongshong shnong ka long ban aijingiada ia ki dohkha dohpnat ha ki bynta jong ka wah Rymben, kata ban ailad ia ki ba kin nang roi khlem kano kano ka jingshah pynthut.

Ha katei ka jingialang plie ba la pynlong hapoh Lumwahniai Community Hall la wan iashim bynta lang da ki nongialam shnong, ki riew shemphang kiba iadei bad ka mariang, ki heh sorkar bad kiwei kiwei.

Na ka liang I Dr. Bashida Massar, Associate Professor ka Department  Zoology hapoh St. Anthony’s College, Shillong bad iba dei ruh i Co-PI jong kane ka project i la batai bniah ha kaba iadei bad kane ka bynta kaba iadei bad ka jingpynneh pynsah ia ki dohum dohwah.

Kumjuh u Bah P Lyngdoh ophisar na ka tnat Fishery ruh u la pynpaw ba ka jingshim jong ki nongshong shnong ia kane ka sienjam ban iada ia ki dohkha dohpnat ha ki bynta jong ka wah Rymben ka dei ka sienjam kaba kongsan na ka bynta ban pynneh pynsah bad na ka bynta ka koit ka khiah jong ki jingthaw kiba im hapoh kane ka wah, bad u la pyrto ruh ia kane ka jinglam lynti ba la shim da ka shnong Lumwahniai.

Kiwei pat kiba la iadon lang ha kane ka prokram ki kynthup ia u Dr. Jagdish Krishnaswamy na  IIHS, Bengaluru, S Khongsam, Chairman Ka Kynhun ki San Shnong, bad P. Lyngdoh, ophisar na ka Tnat Fishery E.K.H. District.Ki nongkren ki la pynpaw ia ka jingkongsan ban shim ia kiba kum kine ki lad jingiada da ki kynhun nongshong shnong.

La sdang ia kane ka prokram da ka jingkren pdiang sngewbha na u Rangbah Shnong ka Lumwahniai u bah M Khonglam uba la pynpaw halor ka jingshim rai jong ka shnong hi abroh kawei ban pynneh pynsah ia ki dohkha dohpnat kiba don ha ka bynta jong katei ka wah.