Ai jingiarap ka Jaintia Hills Development Society sa ha Mihmyntdu

Syllad | The Rising MeghalayaApril 30, 2020

Haba bteng ha ki kam leh isynei, ka Jaintia Hills Development Society (JHDS) kaba dei ka Social Wing jong ka Jyllaniam Jowai sa shisien pat kala kner ia ka kti jingiarap da ki marbam kynthup u khaw, u dai, u phan, u piat, shini bad slasha sha ki 170 tylli ki long-ing baduk jong ka shnong Mihmyntdu haka sngi Palei.

Ia kine ki jingbam ba kongsan la sam hapoh ka jingialam u Director ka Jaintia Hills Development Society (JHDS) u Fr. Manbha Pakem ha ryngkat ka jingiadonlang u Coordinator ka JHDS u Bah Denis Kurkalang, u Secretary Dong Lumpyrtuh Ma Lamshwa Chyrmang bad u Ma Fedrick Synnah.

Haba ai jingkren u Fr. Manbha Pakem u la ai pynshai paidbah halor ka kamram ba ki nongshong shnong ki dei ban leh khnang ban iada na ka jingsaphriang jong u khniang jingpang COVID-19. U la bynrap ruh ba haduh mynta ym pat don ki dawai balah ban pyniap ia kane ka jingpang, hynrei dei tang da ka jingiada da lade ialade hi da kaba bud ryntih ia ki jingbthah jong ka Sorkar.

Shuh shuh u la bynrap ruh ba ka JHDS ka don ka jing kitkhlieh ha ka ban ia don bynta lang haki jingeh ba ki briew ki iakynduh ha kum kane ka por. 

Kum ban shu pynkynmaw, ka JHDS ka la don bynta ryngkat bad ka Sorkar ha ka ban ialeh pyrshah ia u COVID-19 naduh ba la pynbna ia ka lockdown ha baroh kawei ka Ri da ka Sorkar India.

Ka JHDS ha kane ka lockdown kala ai jingiarap haduh 1299 tylli ki longing baduk na ki 34 tylli ki Shnong jong ka East bad West Jaintia Hills District.

Shuh shuh u Deputy Commissioner ka West Jaintia Hills District u la dep pynbna ba la jied ia ka JHDS kum ka Mother NGO ban iatreilang bad ka Sorkar ha ka ban ialeh pyrshah ia une u khniang jingpang. 

U Ma Fedrick Synnah u la ai ka jingkhublei kyrpang ki Team jong ka Jaintia Hills Development Society hapoh ka jingialam jong u Director kiba la pyni shisha ba ki don ka jingkitkhlieh na ka bynta ki duk ki rangli bad u la kyntu ruh ia ki paidbah ba kin nym duh jingkyrmen ha kum kane ka por pynban ki dei ban iasnohktilang bad ka Sorkar Pdeng kumjuh ka sorkar Jylla khnang baroh ka wei ka ri bad ka jylla ban pyndkut ïaka kynjri jingpur bad pdiang une khñiang jingpang.