Ai jingiarap ka KSU sha ki longïing ba duk tasam haka shnong Mukhla Nongrim

Syllad | The Rising MeghalayaNovember 7, 2021

Ka Khasi Students’ Union, Thadlaskeiñ Unit kala ai jingiarap da ki mar bam sha ki lai tylli ki longïing kiba duk tasam haka shnong Mukhla Nongrim, kaba hap ha Jowai Constituency.

U publicity secretary Rimiki K Syntiew ula ong ha kane ka jingleit ai jingiarap ka KSU, ar tylli ki longiing ba duk tasam kidei kiba sah khunswet bad kawei pat ka dei ka longiing kaba shong sah tang ha ïingtrep ïingskum.

U Rimiki ula ong ba kane ka longiing kaba sah haka iingtrep iingskum kampat ju ioh satia kano kano ka lad jingiarap ne skim ba duk jong ka sorkar. Ka KSU kala ong ba naka por sha ka por kane ka longiing kala ai iaki EPIC, ki Passbook sha ka bor shnong ka Mukhla Nongrim, hynrei kaba lyngngoh haduh mynta mynne kane ka longïing kam pat ioh jingiarap wat tang iwei I tin sopïing.

Hadien bala sakhi ia kane ka jingeh kane ka longïing ka KSU kala shim iaka rai ban tynrong halade iaka jingkitkhliah ban pynioh jingiarap ia kane ka longiing kumba iohlem kiwei ki longiing ba duk.