Ai jingiarap ka MPUF sha kawei ka longïing ba duk ha Ladrymbai

Syllad | The Rising MeghalayaAugust 21, 2019

KHLIEHRIAT: Ka seng Meghalaya People United Front (MPUF), East Jaiñtia Hills District haka sngi Balang hapoh ka jingialam u Kyrshan Blah President Khliehriat Circle ryngkat bad kiwei de ki dkhot ki la leit ai jingiarap da ka dewbilat sha kawei la longïing baduk.

Kane ka longïing baduk kadei jong ka Kong Meris Dkhar, kaba shong basah ha ka Dong Khliehdupon Ladrymbai, East Jaintia Hillls District.

Hashwa ban aiti ia kane ka dewbilat sha ka kong Meris la don ka jingialang kaba lyngkot kaba pyniaid da u Hamwer Bhoi Publicity Secretary.

U Kyrshan Blah, ula ong, ka seng ka ai ki jingai ki jingiarap ban kyrshan ia kiba duk katba ki lah ka bor khamtam sha kito ki longïing kiba donkam shisha iaka jingiarap.

Ula kyntu ruh ia kane ka long iing ba ki dei ban pyndonkam hok ia ka jingai jong ki wat la ka jingai kalong kaba rit ruh. U Kyrshan u la ong ruh ba na ka liang ka seng kan iai bteng ban ai ka jingiarap sha kiba duk kiba donkam hok ka jingiarap katba kot ka bor, hynrei u kyntu ruh ia ki briew ba kim dei ban shaniah tang ha ka jingiarap jong kiwei hynrei ki dei ban long kiba trei shitom ha kano kano ka kam kaba ki trei.

Na ka liang u Michael Chyrmang President MPUF-EJH, u la ong ba ka jingnoh synniang jong ngi sha kiba duk ka long kawei na ki kam leh isynei bad iarap iaki para briew. U kyntu ruh ia ki dkhot jong kane longïing ba ki dei ban long kiba trei shitom wat lada ka kam ka long kaba rit ne kitrei ha kano kano ka jait kam ruh kam pher hynrei tang ban trei hok iaka kam. U la ong ruh ba ngi dei ban peit iaka nuksa jong ki dkhar (bar jylla) ba ki wan kamai sha poh ka jylla jong ngi haki kam barit ba ria ruh, hynrei da ka jingtrei shitom jong ki ki dap ki biang hi.

La ïoh ki kyntien kyntu kynpham na u ma Thynanda Sana uwei na ki dkhot ba rangbah jong ka MPUF.

Ka seng ha kane ka sngi ka la pynkynmaw ruh ba ha une u bnai uba la dep ka seng ka la iohlad ban noh synniang sha kawei ka longiing ba duk ha ka shnong Kuliang (Umkiang) da ka ki tip sop iing.