Ai jingiarap ka Panaliar iaki nongtrei ASHA

Syllad | The Rising MeghalayaJune 16, 2021

Mynta ka sngi da ka jingiarap kylluid mynsiem ki lai ngut ki nongshong shnong ka shnong Panaliar kila ai jingiarap sha ki nongtrei ASHA kiba peit iaka shnong Panaliar baroh kawei.

Kine ki lai ngut ki nongshong shnong kiba la ai jingiarap sha ki ASHA ki dei u Yoofranky Laloo, u Phrangsngi Challam bad u Lakhon Passah.

Shuwa ban ai ia kine ki jingiarap la don la jingialang kaba lyngkot kaba pyniaid da u Assistant Waheh Chnong Phrangsngi Challam, ka kyntien kyrkhu kyrdoh bad ai mynsiem iaki nongtrei ASHA kumjuh iaki nongai sngewbha da u general secretary Panaliar u Careme Phawa. La ioh ia ki kyntien ai khublei na u Anewma Sumer.

Ka shnong Panaliar kala pynpaw ka jingsngewnguh ia kine ki lai ngut ki khun ka shnong kiba don ka mynsiem ban ai bad ai khublei ruh iaki 2 ngut ki ASHA ka shnong kiba la trei shitrhem wat hapdeng ka jingioh kaba rit khamtam ha kum kane ka por ka saw ka sian ba hap ban iakhun iaka jingpang khlam COVID-19 ban pynthikna ba ki khun ka shnong Panaliar ioh iaka jingsumar bad ki jingmyntoi na ki prokram ka tnad ka koit ka khiah.