Ai jingiarap u Dy.CM ia u Steve Jyrwa uba iakhun ha ka India Best Dancer

Syllad | The Rising MeghalayaSeptember 12, 2024

U Symbud Myntri Rangbah ka jylla u Bah Sniawbhalang Dhar haka 11 tarik Nailur u la ai ka jingiarap ba T.50,000 ha ryngkat ka jingkitbok kitrwiang na ka bynta u Steve Jyrwa uba la mihkhmat ia ka Jylla ha ka jingiakop India’s Best Dancer kaba la long ha ka sorbah Mumbai.

U Bah Sniawbhalang ula aiti ia kane ka jingiarap pisa sha ka kmie jong u Steve Jyrwa, ka Kong Bibi Jyrwa ha ka jingiadonlang ki bahaiing bahasem bad u President ka All Meghalaya Dancers Association (AMDA) Bah Kitbok Thabah.

Na ka liang u DyCM u la kyntu ruh ia ki nongshong shnong ka Jylla ba kin ai ka jingkyrshan kaba pura na ka bynta u Steve lyngba ka vote khnang ba un ioh ia ka jingjop ha kane ka jingiakop.

“Nga sngewkmen shibun ban iakynduh ia ki kmie ki kpa jong u Steve uba la mihkhmat ia kaJylla ha katei ka jingiakop ha kaba u la don ha ka top 6, bad ngi kyntu ia ki paidbah ka jylla ba kin vote ia u namar ka jingjop ka jong u kan dei ruh ka jingjop ia ka jylla hi baroh kawei,” ong u Bah Sniawbhalang.

Lah ban kdew ba u Steve Jyrwa uba dei na War Nongmensong u la shah jied sha ka ‘India’s Best Dancers’ bad mihkhmat ia ka jylla Meghalaya.

Na ka liang ka AMDA ka la kyrpad ruh ia ka sorkar Jylla ba kan ai ka jingkyrshan ia ki samla don sap kum ia u Steve lyngba ka jingiarap pisa hapdeng kane ka jingiakop kaba dang iaid shakhmat.