Ai jingiaroh u Lat ia ka synshar khadar ki jaidbynriew ka Jylla ha ka jingrakhe ia ka National Voters’ Day

Syllad | The Rising MeghalayaJanuary 26, 2025

U Lat ka Jylla u CH Vijayashankar ha ka 25 tarik Kyllalyngkot u la ai ka jingiaroh halor ka rukom synshar paidbah ba kyrpang jong ka Jylla Meghalaya kaba la pynshong nongrim katkum ki riti dustur tynrai.

U Lat u la pyrto ruh ia ka rukom synshar kaba iashim bynta lang jong ki jaidbynriew Khasi, Jaintia bad Garo kiba iadei bad ka jinglong ba kongsan jong ka synshar paidbah.

Haba aijingkren ha ka jingrakhe ia ka National Voters’ Day ba la pynlong ha U Soso Tham Auditorium, Shillong, u Lat u la ai ruh ka jingiaroh ia ka Election Commission of India bad ia ka Tnat Election ka Sorkar Jylla halor ka jingtrei shitom ban pynlong ia ka elekshon kaba khuid ba suba bad kaba laitluid khamtam ha ka por ba pynlong ia ka elekshon Lok Sabha kaba 18 ha u snem 2024, ha kaba la sakhi ia ka jingwan iashim bynta shitrhem jong ki paidbah nongthep vote bad kaba la thaw ruh ia ka rekod kaba kot haduh 76.61%.

Ia kane ka prokram ba la khot pynlong da ka ophis u Chief Electoral Officer, Meghalaya ban rakhe ia ka 15th National Voters’ Day halor jong ka phang, “Nothing Like Voting, I Vote for Sure.”

Ha kane ka prokram la wan iashim bynta ruh da u Chief Secrtary ka Jylla u Bah DP Wahlang, u Dr. BDRTiwari, IAS, CEO bad ka Deputy Commissioner ka East Khasi Hills, ka Kong Rosetta Mary Kurbah.

Kane ka prokram ka pynskhem biang ia ka jingai jong ki paidbah ka Meghalaya ia ka jinglong jong ka synshar paidbah bad ia ka bynta kaba kongsan jong uwei pa uwei u nongthep vote ha ka ban pynskhem ia ka nongrim jong ka ri synshar paidbah.