Ai jingithuh bad leh burom ka sorkar Jylla ia ki nongtem nongrwai kiba la neh palat 15 snem

Syllad | The Rising MeghalayaMarch 15, 2024

U Myntri Rangbah ka Jylla u Conrad K Sangma ha ka 14 tarik mynta u bnai u la pynkup burom bad ai ka jingithuh ia ki nongrwai bad ki nongtem kiba la don ha kane ka kam mynta lah palat 15 snem kynthih ha ka jingialang jong ka Meghalaya Grassroots Music Project, Season 2 kaba la long hapoh Marriot Shillong ha ka jingiadon lang u khlur ba pawnam ka Bollywood u John Abraham.

Haba kren ha ka jingialang u Conrad u la pynkynmaw ia ki por kiba la leit noh kiba u don ia ka jingsngewtynnad ha ka liang ka tem ka put kum u samla, bad ba kitei ki jingangnud bad jingthrang ka jong u ki dang iai don sah ha ki jingmut jingpyrkhat jong u.

“Man k por ba Nga pyrshang ban shna ia ki polisi Nga ju kynmaw ia kito ki por kiba la dep bad pyrshang ban plielad ia ki samla kiba mynta ia ka rynsan ba kin lah ban pynurlong ia ka jingangnud ka jong ki, kata ia kaba ngim shym la lah ban ioh ha ki por ki jong ngi,” u la ong.U la ong ruh ba ka MGMP ka dei kawei na ki prokram kaba aijinghun ban pynurlong ia kane ka thong jong ki samla kiba donsap ha ka liang ka tem ka put bad ka rwai ka siaw.

Nalor kata u la ong ruh ba ka puta ka tem mynta ka la iapher shibun na ki por kiba mynshuwa nar mynta ki la don ki lad jingstad teknologi bad ki rynsan aijinghikai ha kane ka bynta. “Nga kwah ba ki nongtem bad nongrwai kiba dang khynnah ba kin shim ia ki jingiarap lyngba ki jingstad teknologi bad bad kynjoh sha kawei pat ka kyrdan ha ka liang ka rwai bad ka tem ka put.

“Ka MGMP nalor ba ka plie ia ka rynsan na ka bynta ki samla nongtem nongrwai ka lah ruh ban btin lynti I ki halor ki jingtip kiba iadei bad ki kam thoh bad thaw jingrwai khnang ba ki nongtem ki jong ngi kin lah ban iashim bynta ha kata ka rukom kaba iahap bad kiwei pat ki kynhun jong ki ri ka pyrthei,” ong u Conrad. U Conrad u la pynpaw ruh halor ka jingmut ban aijingkyrshan ia kine ki kynhun da ka jingkyrshan pisa khnang ba kin lah ban thied ia ki tiar tem tiar put.

Kumjuh u Conrad u la kular ruh ban pynioh da ka Ibanez Guitar sha uwei u nongtem uba don jingduna ha ki dkhot met uba la pyni iala ka sap ka phong ha katei ka jingialang bad ula pynpaw ha u Myntri Rangbah ia ka jingangnud ban don kawei ka Guitar.

Nalor kata u CM ula ong ba ka MGMP kan dei ka prokram ka ban dang iai bteng bad ula kyntu ia ki nongrwai bad nongtem ba kin ialeh ban kyntiew ha ka jingdon ia ki nongkyrshan ki jong ki bad ban pynsaphriang ia ka khubor kaba bha halor ki mat kiba iadei bad ka imlang sahlang ban kiar ia u Droks, ban lehkhuid leh suba, ban iada ia ka mariang bad kiwei kiwei.

Katba na ka liang u John Abraham u la ong kaei kaba ka sorkar ka la leh ban plie ia ki rynsan halor ki kam ialehkai sports, ha ka liang ka put ka tem ka rwai ka siaw kumjuh ia ki khynnah samla ka dei ka sienjam kaba itynnad shibun.

Shuh shuh ha kane ka jingialang u Myntri Rangbah bad kiwei pat ki riewkhmat kila pynkup burom ia u Tengnang Sangma, Gracyl Ropmay, Starly Shullai, Felix Langstieh, Cinda Sangma, Amabel Susgni bad Desmond Rimaki Sunn bad la pyllait paidbah ruh ia kawei ka kot kaba la tip kum “The Songs of Our People,” kaba la thoh da u Anurag Banerjee.

Ka MGMP Season 2 naduh ba la sdang ia ka ha ka 4 tarik u Risaw 2023 ka la lah ban pynlong haduh 730 ki prokram ha kylleng ka jylla ia kaba la wan ban iashim bynta da palat 1000 ngut ki nongrwai bad nongtem. Ka jingioh kamai jong ki nongrwai bad nongtem kala kiew na ka T.10,000 haduh T.12,000 ha kawei kiwei na ki prokram jong ka Season 2.