Ai jingkyrshan pura ka MeTTA-NEHU ia ka jingdawa weng kam ia u registrar bad ki deputy registrar

Syllad | The Rising MeghalayaOctober 31, 2024

Ka Meghalaya Tribal Teachers’ Association (MeTTA-NEHU) ka la ai ka jingkyrshan kaba pura ia ki jingdawa jong ka NEHUSU bad NEHUTA ban weng kam noh mardor ia u Registrar bad ia ki arngut ki Deputy Registrar kiba dang shu thung hadien ba la lap ba kim long satia kiba tbit bad kim biang satia ban pyniaid ia ki kam ki jam.

Ha u kyrwoh ba la pyllait ha ka 30 tarik u Risaw, ka MeTTA-NEHU ka la pynpaw ia ka jingsngewkhia ia ka jinglong jingman hapoh NEHU namar ka jingbym treikam hok jong u Registrar bad ki Deputy Registrar kiba dang shu shah thung shen.

Ka Association ka pynpaw ruh ka jingsngewkhia halor kiba bun ki jingdkoh bad ki jingleh bym hok ha ki jingtreikam jong kine ki ophisar ki bym don jingtip ei ei ia ki Rule bad ki rukom pyniaid kam.Kine ki la paw ruh lyngba kiba bun ki shithi kiba ki la phah na ka por sha ka por.

“Katkum ki tyllong khubor la ioh jingtip ba ki don shibun ki kyrtong kiba biang kyrdan bad kiba la tbit kiba la shakri ha ki Tnad bapher bapher ka Sorkar Jylla kiba la aplai ia ka post hynrei kiba la shah kyntait. Hynrei u Amit Gupta u bym don ka jingtbit bad jingshemphang ha ki rukom pyniaid ia ka University u la shah thung kum u Deputy Registrar,” ka la kynnoh da kaba bynrap , “Nalor kata la ioh jingtip ruh ba ha ka jingthungkam kaba dang shen ia ki post kontrak ha ka Integrated Teacher Education Programme (ITEP), NEHU, ki don bun ngut ki kyrtong kiba biang kyrdan hynrei ki bym shym la shah khot sha ka interview, katba ki kyrtong ki bym biang kyrdan ki la shah thungkam.”

“Haba khmih ia ka jinglong jingman ba mynta hapoh NEHU, ka Association ka ai ka jingkyrshan kaba pura ia ka jingdawa jong ka NEHUSU ban weng kam noh ia u Registrar Col (Retd) Omkar Singh bad ka jingdawa ka NEHUTA ban weng kam ia ki arngut ki Deputy Registrar kiba dang shu shah thung ia kiba la lap ba kim long satia kiba tbit ne kotbor ban pyniaid ia ki kam ki jam.”