Ai jingkyrshan pura sa ki nongtrei ka NEHU ia ka jingdawa ki samla pule ban pynhiar shuki ia u VC

Syllad | The Rising MeghalayaNovember 12, 2024

Ki nongtrei Non-Teaching Staff hapoh ka shatri jong ka North Eastern Hill University Non-teaching Staff Association (NEHUNSA) ki la ai ia ka jingkyrshan kaba pura ia ka jingiakhih shah thngan jong ki samla pule ba la ialam da ka NEHUSU halor ka jingdawa hiar shuki ba mardor ia u Vice Chancellor kane ka skulbah u Prof PS Shukla.

Ia kane ka rai la shim ha ka General Body Meeting kaba la shong kyrkieh ha ka 11 tarik u Naiweng.

U President ka NEHUNSA u Dr WR Synrem u la ong, “Ka NEHUNSA kam kwah satia ban iohi ba ka University kan long ka jaka aijinghikai ia ki ophisar ba thungkam. Ha kawei pat ka liang ngi khmih lynti ba ki ophisar kiba bat ha ki kyrdan kiba halor ki dei ban btin lynti ia ki nongtrei katkum ki rule ba la mynjur da ka Sorkar India.”

Nalor kata u la kynnoh ruh ba naduh ba la wan shimti une u Vice Chancellor ba mynta, baroh ki kam hapoh ka University ki la thut lut na ka daw ka jingbym nang jong u ban trei. Kum ki nongtrei non teaching staff kiba don bynta beit beit bad ka kam pyniaid ia ka skulbah ki bynniaw jur halor ka jingpynslem ha kaba pyniaid ia ki file, bad ba u soh uba mih u long ka jingslem ban pyniaid ia ki kam ki jam ba man ka sngi hapoh kane ka skulbah.

“La iohi kumba u Vice Chancellor u la wan sha kane ka skulbah na ka bynta ban shah hikai, kaba ym shym la khmih lynti satia kum ia u khliehduh jong ka ophis,” ong u Dr Synrem.

Haba pynpaw ba ia ka interview ia kane ka Statutory Post (s) jong ka University la pynlong ha Guwahati, ia kaba u Vice Chancellor u la pynpaw ba ka dei ka kam kaba kyrkieh ban thungbriew ha kine ki kyrdan, u president ka Seng u la ong, “Hynrei kaba la pynkyndit ia ngi ka long, ka shuki Controller of Examination kaba la kynthup lang ha ka interview la shah ban wan trei haduh hynriew bnai hadien ba tywa ia ka jingthung kam sha u.”

“Dang shen la thung ia i Deputy Registrar bym nangbha wat tang ban kren English, kata watla ka dei ka ktien ba pyndonkam ha ka University, bad kane ka la ktah bha ia ki jingtreikam ba man la ka sngi jong ka ophis,” u la bynrap.

Nalor kata u Dr Synrem u pyntip ruh ba ka jinglong jingman jong ka surok hapoh ka campus ka la sniew shibun bad ka bym pat ju jia satia naduh ba la seng ia kane ka skulbah. Ia kane ka kam ruh la iai bteng ban iakren bad u Vice Chancellor hynrei um shym la leh ei ei kat haduh mynta.

U la ong ruh ba ki quarter ba la ai sha ki nongtrei ruh ym shym la sumar ne pynbha da ka University ha kaba kiba sah ki la hap ban pynlut na lade na ka bynta kino kino ki kam maramot kiba rit ne ba heh, kata wat lada ia ka House Rent Allowance (HRA) la ot man la u bnai.

Kumjuh ki street light kiba dei ki bynta kiba kongsan ha ka por mynmiet kim shym la treikam bad kaba la buh ha ka jingbym shngain ia ki briew kiba shong ba sah hapoh ka campus kynthup ia ki samla pule.

U Dr Synrem u pyntip ruh da kaba ong, “Dang shen katkum ka RTI ba la ioh pdiang, ka la kren shai ba ka jingthung kam Compassionate ha ki ophis ka Sorkar Pdeng ka dei ka bym shym la pynsangeh satia, hynrei ka University kan dang pynmih ia ka jingpynbna halor kane.”

“Ia ka Medical Advance kaba donkam ban ai hapoh ka 10 sngi katkum ka rule ka Sorkar India @90% na ka jinglut ba la mang la pynslem ban ai sha uwei na ki nongtrei uba don hapdeng ka jingshitom kaba jur. Kane ka jingpynslem ka long haduh palat shi bnai bad kaba la wanrah ka jingeh kaba khraw ia une u nongtrei kumjuh ia ka iing ka sem ka jong u. Kane ka pyni ia ka jingbym tip satia ia ki rule ba la buh na ka bynta kane ka kam,” u la ong.