Ai jingkyrshan u Dolloi Narpuh iaka jingiakhih dawa maramot iaka surok NH-6

Syllad | The Rising MeghalayaJune 17, 2024

U Dolloi Elaka Narpuh u Ma Manbha Kyndoh ula ai ka jingkyrshan kaba pura iaka jingrai iakhih paidbah ka JAC Dong Namchiang ban pynbor iaka sorkar ban maramot mardor iaka surok Bah National Highway 6 naduh Tongseng haduh Malidor.

U Dolloi Narpuh ha u kyrwoh ba ula phah ula ong “Ym lah ban len ia ka jingsniew tasam jong u surok hapoh ka Dong Namchiang naduh Tongseng haduh Malidor kaba la wanrah shisha ia ka jingduhnong kaba khraw ia ki paidbah. Ka jingsniew u surok ka la wanrah ka jingdheng kali ka jur nalor ba ka buh jingma ia ki nongleit nongwan lyngba kane ka surok National Highway ka bym I kop shuh ban khot National Highway. Ka la long kum ka surok khlaw kaba don shibun ki thliew ki syar.”

Ki paidbah kiba shong ba sah ha ki bynta ka Dong Namchiang ki hap ban wan donkam man la ka sngi sha Khliehriat kaba long ka District Headquarter na bynta ban leit shim dawai, ban leit die sha iew ia ki mar rep ki soh ki pai, kwai tympew bad ruh na ka bynta ki kam skul bad Office, hynrei ka jingsniew tasam ka surok NH-6 kala pynlong iaki ban shem jingeh haka leit ka wan bad sahkut ha lynti da ki bun bun kynta, la ong u Dolloi.

Maramot iaka surok bah NH-6 ne mad iaka jingiakhih; ong ka ka JAC ki 11 shnong iaka sorkar

Kumta, kum u Dolloi & u Chairman, ka Elaka Narpuh, um lah ban shu peit tang ki khmat ia ka jingjynjar ki paid ki raiot jong u. Kumta, ula kyrpad ia ki paidbah jong ka Elaka hi baroh kawei ba kin ia shim bynta bad kyrshan lang ia ka JAC Namchiang ha kane ka jingiakhih jong ka haduh ba ka sorkar kan moramot shisyndon ia kane ka surok.