Ai jingmut AJYWO ban pynbiang iaki jingdonkam ba kyrkieh, pyrshah iaka lynti rel ha East Jaintia Hills

Syllad | The Rising MeghalayaSeptember 13, 2023

Ka All Jaintia Youth Welfare Organisation (AJYWO) haka sngi Nyngkong kala ai da ka dorkhat sha u Deputy Commissioner East Jaintia Hills District bad sha ki ar ngut ki nongthaw ain ka District u Kyrmen Shylla uba long ruh u myntri sorkar bad sha ka MLA kong Santa Mary Shylla ban pynpaw iaka jingpyrshah kaba jur halor ka jingthmu wanrah lynti rel bad dawa ban wanrah iaki jingdonkam ba kyrkieh ha East Jaintia Hills District

Ha u kyrwoh uba la phah da u Heatermoon Ryngkhlem, president AJYWO East Jaintia Zone, bad u secretary general AJYWO Central Body, u Reachingson Siangshai kila pynpaw shai ba ‘Kumba long kiwei kiwei ki sengbhalang bad u paidbah jong ka East Jaintia Hills, bad u paid ka Bri u Hynniewtrep, ka AJYWO ruh, ha kawei ka sur ka pyrshah jur ia ka jingthmu jong ka sorkar jylla ban wanrah lynti rel ha ka District, halor ka nongrim jong ka jingbym pat pyntreikam ia ka Inner Line Permit (ILP) tad haduh mynta ruh ha ka jylla, kumba la leh lang ha kiwei pat ki jylla jong ka thaiñ shatei lam-mihngi ka ri India, ia kaba ka sorkar jylla ka la shim ia rai ha assembly, naduh u snem 2019, ban pyntreikam ia ka na ka bynta ban iada ia ki trai ri trai muluk rit paid jong ka jylla, hynrei kaba la shu leh lyndet mynta da ka sorkar jylla bad sorkar pdeng,” ong U Heatermoon Ryngkhlem, President ka AJYWO-East Jaiñtia Zone.

Kila pynpaw ba ka Jylla Meghalaya ka dei ka jylla kaba rit tam ha ka pyrthei Ri India, kaba dei ka ri ka muluk trai jong ki jaitbynriew riewlum barit paid tam, bad ba dang sahdien tam ha baroh ki liang, kaba don mynta hapdeng ka jingma kaba khraw na ka jingshah tyllep ha kiwei pat ki jaitbynriew heh paid na ri thor India, kiba la iawan rung iawan mih, iawan shong iawan sah, ,iawan trei iawan ktah, iawan kamai iawan kajih katba mon ha ka jylla khlem da don ka aiñ kaba pyrkhing bha ban tehlakam ia kane, kaba la ktah bad buh shisha ha ka jingma kaba khraw ia ka ri bad ka jaitbynriew rit.

U Heatermoon Ryngkhlem ula ong b aka jaidbynriew ka don haka jingma kaba khraw bad kane ka ka dei ka pateng kaba khatduh eh lehse ka ban wad ia ki lad ki lynti ban iada ka jait bynriew rit paid jong ngi lym kumta yn nym don shuh lehse mano mano ruh em ban leh ia kata.

“Lada ma ngi kiba mynta, ngim iatrei mynta hi ban iada ia ka jait bynriew lajong mano pat bad lano? Ka jingshongsuk shongshngaiñ bad ka jingim laitlud jong ka Jaitbynriew ha la ka jong ka ri wat la da duk da kyrduh ruh ka kham kor shi katdei eh ban ia ka roi ka par ka ban tuh noh ia kita baroh na ngi,” la ong u Heatermoon

Ula ong shuh shuh ba “Ka East Jaintia Hills, ka dei ka district kaba rit, kaba don tang 1,22,939 tam ngut ki trai shnong kat kum ka PPF, 2011 census. Tang lyngba jong ki surok ka la long lypa ka District kaba la shah jan shah tap tyllep da ki briew kiba na bar ka jylla, kaba la ktah mynta haduh katta katta, ia ka ioh ka kot, ka khaïi ka pateng bad wat ia ka jingbun paid bad ruh ia ka jingshongshngaiñ jong ki trai shnong bad sa katno tam lada ka lynti rel kan wan?”

Reachingson Siangshai, u la ong, “Lada kane ka lynti rel kan wan, kan plie lad shuh shuh ia kiwei ki jaidbynriew heh paid, na ri thor Ri India ban wan rung wan mih, wan shong wan sah bad ruh wan kamai kajih bad wan trei wan ktah katba mon shapoh jong ka District bad kane kan ktah iaki trai shnong khamtam ia kito kiba don truck bad ia baroh kito kiba im jaka kpoh na ki truck. Wat ki mar rep trai ri trai muluk ruh kin sa shah ktah jur namar kiba kum kita kin sa wan rung suk lyngba katei ka lynti rel na kiwei pat ki jylla.”

Kine ki ar ngut ki nongialam ha u kyrwoh kila ong ba ka AJYWO ka kren shai iaka sorkar bad ieng skhem  haka njongrim ba ia mynta hi, da lei lei ruh kin nym lah ban pdiang ia ka lynti rel ha ka District.

KA AJYWO kala ai jingmut iaka Sorkar jylla ba kan pynleit jingmut ha kaban wanrah iaka roi ka par kiba don kam hakhmat eh kiba kynthup iaka jaka ai jingsumar, ban pynshna ia ki surok ban pyniashnoh ia ki thaiñ nongkyndong, ban wanrah ia ka Government Secondary, Higher Secondary School bad ka Government College hapoh ka district. Nalor kata ka AJYWO kala ong shuh ba dei ban shna iaka District Auditorium cum Library, ban maramot wut wut iaka surok NH-6 kaba la isangsot mynta bad ban shna da ka surok bah sawlaiñ (Fourlane) naduh Damsite, Ri Bhoi District haduh Malidor East Jaintia Hills District bad kiwei kiwei de ki kam pynroi pynpar ba donkam kyrkieh.