Ai jingmut ka HANM FKJGP ban pynkylla spah iaki jaboh plastic ha rilum Jaintia HIlls

Syllad | The Rising MeghalayaJanuary 25, 2022

Ka Hynñiewtrep Achik National Movement (HANM) Jaintia Zone bad Federation of Khasi Jaintia & Garo People (FKJGP) Jaintia Zone kala ai jingmut iaka sorkar ban buh noh da ka recycle plant ban pynkylla spah iaki jaboh plastic ha rilum Jaintia HIlls.

Ka HANM bad ka FKJGP kila ong ia kane haka sngi ba ar hadien ba ka Jaintia Hills kala syrtap da ki ñiut plastic haki jaka ba paw khamtam haki jaka iew bad ki lynti syngkieng bad ki lum ki wah.

U working president HANM Jaintia Zone u Pynshngaiñ Papang; ula ong ba baroh ki nongshong shnong ki dei ban kiar iaka jingbret pathar iaki ñiut ki nier kat shaba lap ba shem namar ba ka ktah iaka sawdong sawkun ka mariang bad ka koit ka khiah u briew.

“Ngi la sakhi ruh ba wat ki huggies ne ki jingsop iaki khyllung khynnah la bret pathar sha ki lynti syngkieng bad ki um ki wah, kaba lah ban ktah iaka khuid ka suba ki um ki wah,” la ong une u nongialam ka HANM.

Bun ki wah kim long shuh ban pyndonkam ha kane ka thain bad ka wah Umïurem kaba don ha Shangpung kala shah ktah naki jakhlia jakhlait ba pyntuid u briew, kumta kine ki ar seng kila kyntu ia u paidbah ban kiar na ka jingpynjaboh iaka wah bad ban pynneh iaka khuid ka suba.

U Organizing Secretary FKJGP West Jaintia Zone u Wompher Wann ula kyntu iaki nongniah kali bad ki paidbah ba kiar na ka jingbret pathar iaki jaboh plastic bad kiwei kiwei ki ñiut ki nier bad ban iakhun ban pynneh pynsah iaka khuid ka suba.