Ai jingmut ka High Court ban don ka jaka thang lang na ka bynta ki jaidbynriew Khasi-Jaintia bad Hindu

Syllad | The Rising MeghalayaOctober 26, 2024

Ka High Court jong ka Meghalaya ka la ai jingmut ban don ka jaka thang lang ne crematorium na ka bynta ki jaidbynriew Khasi-Jaintia kiba bud ia la ka jong ka jong ka niam tynrai bad ka jaidbynriew Hindu.

Ka iing bishar ka la ai jingmut haba bishar ia ka mukotduma paidbah (PIL) jong ka Re-Seng Khasi Hima Crematorium pyrshah iaka State of Meghalaya.

Ka iingbishar ka la ong ba watla ki trai ri trai muluk Khasi bad Jaintia ki thang ia ki met iap jong ki da kaba bud kham bun ne kham duna ia kajuh ka rukom kum ki Hindu, hynrei ka hok bad ki jingleh niam jong ki kiba iadon ryngkat bad ka jingleit on thang ki iapher bad ki kwah ia ki jaka thang laka jong na ka bynta jong ki. Ki lah ban don katto katne kiba bym pyrshah ban thang iaka met jong ki ryngkat bad ki Hindu ha kajuh ka jaka thang.

Ka iingbishar ka la bthah ïa u Dr. N. Mozika, u Amicus Curiae ba la thung da ka iingbishar ban khot bad pynlong ïa ka jingïalang online bad baroh ki District Magistrate lane ki Deputy Commissioner jong ki khatar tylli ki District ha ka Jylla. Yn bthah ia ki District Magistrate ban wad bniah lyngba ka kyrdan BDO bad kiba kham hapoh bad pyntip sha u Amicus Curiae ia kano kano ka jaka ha District kaba ym don jaka thang ne jaka thang ia ka metiap hapoh 10 kilomitar.

Ka iingbishar ka la bthah ruh ban pyni la ka jingdon jong katei ka jaka thang ka don hapoh 10 kilomitar na kano kano ka jaka, u District Magistrate ne u Deputy Commissioner kin pyni ruh ia ka jingbun briew jong katei ka jaka.

Ka Kashari ka la ong ba u District Magistrate lyngba ki officer kiba hapoh jong u kin pynlong ia ki jingialang bad ki dkhot jong ka jaidbynriew Khasi, Jaintia bad Hindu khnang ban pynsngewthuh ia ki ban pdiang ia kawei ka jaka thang ia kiba iap na ka bynta baroh ki jaidbynriew.

Ka Kashari ka la ong ba lada don ka jingïapher jingmut hapdeng ki ar jaitbynriew ha kaba ïadei bad ka jingïasam lang ïa ka jaka lane kano kano ka mat, u Amicus Curiae un leit jngoh dalade ïa ka distrik bad ïa kata ka jaka kyrpang khnang ban pynthikna katba lah ba ki jaidbynriew Khasi Jaintia bad Hindu kin mynjur ia katto katne ki rukom treikam ba iadei lang na ka bynta ban pynkhuid iaka met.

Ia kane ka Public Interest Litigation la mudui na ka bynta ban pynbeit ia ka jingeh jong ki jaka thang met iap ha ki nongbah jong ka jylla Meghalaya.

Ka Kashari ka la shim ba ka long kumba la khang pyrshah tang ïa ki jaka thang ïa ki dkhot jong ka jaitbynriew trai ri Khasi bad Jaiñtia ki bym shym la pdiang ïa ka niam Khristan bad Hindu hynrei kala ktah kylleng ka Jylla Meghalaya.

Ha kane ka jingbishar, ka Kashari ka la ong ba ka Directorate of Urban Affairs, ka sorkar Meghalaya, ka la kdew ia ki jaka thang electric hybrid ba thymmai kiba la thmu ban buh ha New Shillong, Tura, Jowai bad Nongpoh.

Ka Tnad ka buh jingkheiñ ruh ïa ki projek kiba la dep pyndep ha Syllei-lawkein, Nongstoiñ, Khliehtyrshi, Jowai, West Jaiñtia Hills bad Jhalupara ha Shillong. Kumta, kumba ka long mynta, ym don kawei ruh kaba treikam.

Ka Kashari ka la bthah ba ïa u Amicus Curiae dei ban siew ïa ka Honorarium kaba T.50,000/- shibnai da ka Sorkar Jylla kaba sdang naduh u bnai Risaw, 2024.

Shuh shuh, baroh ki jinglut bad jinglut kiba mih na u Amicus Curiae dei ban pynlut da ka Jylla. Ka AAG kan pynthikna ba ia ka jingmynjur kaba donkam ban siew ia ka bainong bad ki jingsiew ba la kdew haneng la ioh na ka Jylla.

Ka Kashari ka la ong ba halor ka kaiphod ba la ioh na u Amicus Curiae, “ngi tyrwa ban pynmih shuh shuh ia ki jingbthah na ka bynta kane ka PIL” bad ka Kashari ka la kyrpad ia u Amicus Curiae ban ai ia ka kaiphod haduh ka 20 tarik u Rymphang, 2025 bad la buh tarik ia ka PIL ha ka 4 tarik u Lber 2025.