Ai jingmut ka HYC ïaka KHADC ban thaw aiñ poikha poiman u Khasi

Syllad | The Rising MeghalayaFebruary 5, 2022

Ka Hynniewtrep Youths’ Council (HYC) Sohiong circle kala phah da dorkhat sha u Chief Executive Member (CEM) Khasi Hills Autonomous District Council (KHADC) ban kyrpad ban wanrah ne thaw iaka aiñ Poi-kha Poi-man ne ka Khasi Hills Autonomous District (Khasi Social Custom of Marriage).

Ka Hynniewtrep Youths’ Council (HYC) Sohiong Circle kala ong hadien ba kala puson bha halor ka jingpynkhlaiñ ïa ki lariti ïa poikha poiman jong ka jaidbynriew kala pynpaw ba kala dei ka por ban wanrah da ka ain ban pynjanai shuh shuh iaka poikha poiman u Khasi.

Ka HYC kala ong ba naduh kulong kumah bad haduh mynta ka jaidbynriew jong ngi ka dang snoh rdin bad bud ryntih kyndong ïa ka Riti ïa poikha poiman bad dei lyngba kane ka riti ki ju pynïaid beit pynïaid ryntih ïa ka kam ïa poikha poiman ha ka imlang sahlang bad ha ka jaidbynriew Khasi hi baroh kawei.

Kane ka Riti ïa poikha poiman, ki arliang kur, ki arliang Kñi ki don ka bynta kaba khraw kumba la buh bynta da ki longshwa manshwa ban rai ne ban ïathew ïawoh ha ka bit ka biang jong ka kam poikha poiman.

Ha kine ki por kiba mynta, kane ka riti ïa poi kha poi man jong ka jaidbynriew Khasi i kumba ka la sdang ban synjor na ka daw ka jingleh klet bad bud noh ïa ka riti ïa poikha jong kiwei pat ki jaidbynriew. Namarkata, ka HYC kala ban ba donkam ban pynskhem bad pynkhlaiñ ba kan long ka jingithuh shai da ka lynti jong ka ain.

Ka HYC kala pynpaw ba long kaei kaei kaba sngewdukkha haduh katta katta ban shem ba haduh mynta haki 69 snem ba la ïoh ïa/treikam ka Autonomous District Council, hynrei haduh mynta ka KHADC kam don iaki kyndon aiñ ban pynskhem iaka riti Poi-kha Poi-man jong ka jaidbynriew Khasi, kaba dei kawei na ki Riti kaba donkam bha.

Ka HYC kala banjur ia u CEM KHADC ban shimkhia ban thaw ia kane ka ain khnang ba ka poi kha poi man kanlong katkum ka rukom ba leh u mynbarim bad ka riti dustur u Khasi.