Ai jingmut ka Katakey Committee ban peitngor da ki drone ia ka kam tih dewiong beain ha Meghalaya

Syllad | The Rising MeghalayaFebruary 13, 2025

Ka Committee ba la khlieh da u Justice (ba la shongthait) u BP Katakey ka la ai jingmut halor ka jingdonkam ban pynlong ka jingpeitngor kaba thikna lyngba ki drone ha baroh ki District khnang ban tehlakam ia ki kam tih dewiong beain ha Meghalaya.

Ha ka kaiphod 27th Interim Report, kaba la aiti hakhmat ka Iingkashari Meghalaya High Court, ka Committee ka la ong, (Ngi ai jingmut) ban pynlong da ka jingpeitngor kaba bniah lyngba ki drone ha baroh ki District jong ka Jylla Meghalaya khnang ban tehlakam ia ki kam tih dewiong beain namar ki don ki jaka kiba shem jingeh bad ba sharing bad katto katne ki jaka ha kaba ki kam tih dewiong beain ki ju jia bad kiba shem jingeh ban lap bad ia kiba dei ban pyndonkam da ki drone ha kawei pa kawei ka District jong ka Jylla lyngba ki  Superintendents of Police (SP) kata hapoh ka shitaiew hadien ba la lap ia ki kam tih dewiong beain kham hashwa lyngba ka jingpeit bniah na ki video.

Ka Committee ka la ban jur ruh halor ka jingdonkam ban thaw mardor ia ka kynhun  ki ophisar kiba aiti ia ka kam, kata ki ban ym long hapoh ka kyrdan jong ki Deputy SP bad kaban kynthup ia ki bor pulit kiba la ioh jinghikai lypa hapoh ka Police Head Quarters, Shillong, lyngba ki SP bad ki ban ai ia ka jingbthah kiba donkam na ka bynta  ban peitngor lyngba ki drone ia ki jaka kiba kongsan da kaba pynshong nongrim halor ki kam tih dewiong beain kiba la dep bad halor ki jingai jingmut kiba lah ban ioh ka ban pynlong ia u heh pulit uba ialam ia ka committee ban khmih ia kane ka jingpeitngor lyngba ki drone bad ban maramot ia ki dur jong ki video haduh hynriew bnai, kata ia kiba la ring ha ka por ba la pynlong ia ka jingpeitngor lyngba ki drone.

“Ka jingaiti ia ka kaiphod man ka taiew halor kane ka jingpeit bniah lyngba ki drone da ki ophisar kiba khlieh ia ka kynhun sha ki SP kaba pyni ia ka jingbun jong ka jingpeit bniah ba la leh, shnong / jaka kiba shah kynthup, ka jingmih lyngba kine ki jingpeit bnaih bad ki case ba la register da ki police station bad halor ki lad jingpynshitom ba la shim; Ka jingpyniasid ia ka jingpeitngor da ki kynhun ba la kdew haneng ba la thaw da ki SP ha man la ki jaka ba la ithuh man la ki police station jong ki District, ka jingaiti ia ka kaiphod kaba man la ka artaiew da ki SP jong ki District sha ka Director General of Police, Meghalaya halor katei ka jingkhynra lyngba ki drone ryngkat bad ka jingpynshisha halor ka jingpynlong ia kum kine ki jingpeitngor da ki drone ha ka rukom kaba dei bad kumjuh ruh ka jingiohi ka jong u halor kiba kum kine ki jingkhynra,” ong ka kaiphod.

Ka Committee ka la aijingmut ruh ban pynmih ia ki jingbthah kiba donkam da ka Director General of Police, Meghalaya lane kino kino ki ophisar ba la ai bor da ma ka ym hapoh ka kyrdan SP na ka por sha ka por bad ha kano kano ka por ba donkam ban pyndonkam ia ka jingpeitngor lyngba ki drone bad kumjuh ruh ban pynioh ia ki thong katkum ka jingpynkhreh ia ki Drone Control Rooms.

Ka la pynskhem ruh ia ka jingdonkam ban aiti ia ka kaiphod da ka Director General of Police, Meghalaya lane ki ophisar kaba ka la aibor sha u Chief Secretary ka Sorkar Meghalaya da kaba pynshong nongrim katkum ka kaiphod abd ki jingai jingmut jong ki SP, abd ruh kaba don ia ka jingpynsngew jong u halor ka jingseisoh jong ki Drone Control Room, kiba ma u hi ne da u ophisar u bym dei hapoh ka kyrdan Additional Chief Secretary ba la ai bor da ma u, u lah ban pynmih ia ki jingbthah kiba donkam ban peitngor bha khnang ban ioh ia ki jingthmu.

Nalor kata ka Committee ka la ong ruh ba ka long kaba donkam ban pynthikna ban pynlong ia ka jingpahara kaba man ka por bad ban pynjur ia kane ha baroh ki jaka da ki SP jong baroh ki District, lem kumta lyngba ka jingpeitngor lyngba ki drone.

“Ki Officer-in-Charge jong baroh ki Police Stations jong baroh ki Distict kin ai ia ka kaiphod man la ka artaiew sha ki SP ba dei peit jong ki District kiba dei ban lumg lang ia kajuh bad ban ai ia ki jingbthah kiba donkam ha kano kano ka por ba donkam. Ia kum kane ka jinglum jingtip yn phah sha ki heh Headquarter ki pulit bad sha ka Tnad Mining and Geology ban shim ia ki sienjam ba donkam ban buddien.Ki SP jong ki District ba marjan kin iatreilang hapdeng jong ki halor kane ka bynta.”

Nalor kata ka la bthah ruh ban pynshai/ buh jingthoh ia ki jinglap ha ki map ba la pynkhreh katkum ka jingjurip kaba na suin (UAV) ba la pynlong da ka MBDA bad ruh ban leh ia ka jingthew ia ka jingthew ia ka jingbun jong u dewiong ba la lap ha ki shnong da ka jingiarap jong ki riew shemphang bad ban aiti ia kane hapoh ka 15 sngi da ka Tnad Mining and Geology ka Sorkar Meghalaya kumjuh ruh ka MBDA. Lah ruh ban shim ia ka jingiarap jong ka North East Space Application Centre (NESAC), Umium, Meghalaya na ka bynta ka jingpynshai / jingbuh jingthoh ia ki jinglap katkum ki map ba la sorbe ba la kdew haneng (UAV) ba la ai da ka MBDA.

Ka Committee ka la bthah ruh ban pyndep ia ka jingjurip kaba na suin da ka M/S Garuda UAV Soft Solution Pvt. Ltd ha East Jaintia Hills, West Jaintia Hills, South Garo Hills bad West Khasi Hills District bad kumjuh ruh ka jingaiti ia ka kaiphod ba khatduh kynthup ia ka volumetric assessment jong u dewiong ba la lap ha kum kane ka jingjurip kaba na suin ha lane shwa ka 28/02/2025, da ka Tand Mining and Geology ka Sorkar Meghalaya.

“Ban shim ia kine ki sienjam harum ban iada ia u dewiong ba la ioh kurup na ka jingjah rngai la ka long namar ka jingshah tuh ne da kumwei pat bad katkum ka jingbit kabadonkam ban ioh na ki Kashari ba dei peit: Ban buh noh mardor ia ki jaka lum thup (centralized depot) lait noh ha South West Khasi Hills (kaba don tang 34.75 MT ha ki byrni ba la thep); ban pynkynriah mardor ia u dewiong baroh uba la kurup katkum ki kyndon jong ka MMDR Act, 1957 sha ka jaka buh dewiong (centralized depot),” ka la ong.

Shuh shuh ka Committee ka la ai jingmut ruh ban sdang noh mardor ia ka sienjam ban die lilam ia baroh u dewiong ba la ioh lum hadien ba la khein lang biang / pynshisha biang.