Ai jingmut ka KHNAM sha ka Expert Committee ban bhah 50% ia ki Khasi Jaintia ne khein kyllum ia ka 80%
Ka Khun Hynniewtrep National Awakening Movement (KHNAM) ha ka 13 tarik Jylliew ka la aijingmut ban bhah 50% na State Reservation Policy na ka bynta ki paid Khasi bad Jaintia da kaba pynshong nongrim halor ka jingbun paid lane ban shu khein kyllum lang noh ia ka 80% ka bha na ka bynta ki Khasi Jaintia bad Garo.
Ia kane ka jingai jingmut jong ka KHNAM la aiti da u President jong ka u Bah Pyndapborthiaw Saibon sha u Bah LK Diengdoh, Secretary ka Expert Committee on State Reservation Policy ba la thung da ka sorkar Jylla na ka bynta ban bishar thymmai ia ka jingpyntreikam ia ka Policy ha ka Jylla.
U Bah Pyndap u la ong ba katkum ka Para 1 jong ka Policy, ia ka jingbhah la pynshong nongrim halor ka jingdon jong ki nongshong shnong kiba dei ki trai shnong riewlum ka Jylla, kata kaba kynthup ia ki Khasi, Jaintia bad Garo.
Nalor kata la kdew ba katkum ka khanasamari jong u snem 2011, ki nongshong shnong kiba dei ki paid Khasi bad Jaintia ki la palat ia ka 5,78,918 ngut haba ia nujor bad ki paid Garo, bad kane ka jingiapher ka lah ban kiew ruh shaduh ka 9,49,756 ngut hadien ba yn pyndep ia ka khanasamari ka ban wan.Kumta kane ka jingiapher ka pynpaw halor ka jingdonkam ban pynshong nongrim katkum ka jingdon paid haba khein ia ka percentage ban aibhah lyngba ka Reservation Policy.
Nalor kata khnang ban lait na ka jingmih ki kynrum kynram hapdeng ki nongshong shnong ka jylla halor kane ka jingdawa, ka KHNAM ka la aijingmut ban khein kyllum ia ka bhah kaba 80% ia ki paid Khasi, Jaintia bad Garo, kata da kaba pynshong nongrim katkum ka jinglah ne merit.Kane kan pynksan ia ka kyndon jong ka ‘Maintenance of Efficiency in the Administration’ kumba la kdew ha ka Para 1 jong ka Policy. Lane ban bhah 50% ia ki paid Khasi bad Jaintia namar ka jingbun paid, ong ka KHNAM.
Ka KHNAM ka la aijingmut ruh halor ka jingdonkam ban weng noh ia ka kyntien “Autonomous State” na ka Para 1 jong ka State Reservation Policy 1972, namar ia ka Meghalaya la pynbna kum ka Jylla kaba pura ha ka 2 tarik u Kyllalyngkot 1972.
Ka la pynpaw ruh halor ka jingdonkam ban pynkylla noh ia ka Para 2 jong ka Policy da kaba weng noh ia ka kyndon ban rah shakhmat ia ki kam kiba lait. Ka la kdew ruh ba ka jingrah shakhmat ia ki kam kiba lait khlem da thung briew ka dei kaba iaid lait pyrshah ia ka jingthmu jong ka Policy.
Kumjuh ka KHNAM ka la dawa ruh ban pynduh noh ia ka Office Memorandum (OM) kaba 28 tarik Jymmang 1974, kaba ailad ban thungkam ia ki kam ba la bhah na ka bynta ki Garo ban thung da ki bym dei ki Garo ne ki briew kiba nabar ka Jylla. Ka la ong ba kane ruh ka long pyrshah ia ka jingthmu jong ka Policy khnang ba ki nongshong shnong ka Jylla kin ioh jingmyntoi na ka Policy.
Ka la dawa ruh ban pynkylla ia ka OM kaba 18 tarik Nohprah 1972 kaba pynpaw halor ka bhah ba la mang ia ki kam ba lait ha ki District level, ha kaba ki nongioh kam kim lah satia ban shah pynkynriah kam shabar na ka district ba ki ioh kam ha kaba la buh ia ka bhah kyllum ba 80% ia ki paid Khasi, Jaintia bad Garo ha ka jaka ban phiah mar 40% ia ki paid Garo bad Khasi Jaintia.
Ha kajuh ka por ka KHNAM ka la ong ruh ba kumba ka long mynta ki District level post ha Ri-lum Garo ki dei kiba don tang da ki paid Garo suda katba ha Ri-lum Khasi bad Jaintia Hills pat, ki Garo kila shah thungkam ha ryngkat ki paid Khasi Jaintia.
Shuh shuh ha kaba iadei bad ka jingpyntreikam ia ka State Reservation Policy ha ka jingbhah ha ka liang ka puthi puti, na ka liang ka KHNAM ka la aijingmut ban wanrah lang noh ia ka kyndon bathymmai khnang ban pynpa shai ba ka State Reservation Policy 1972 ka dei kaba la mang beit thik tang ha ka thungkam thungjam.
Kumta ruh halor kine ki bynta ba la kdew na ka liang ka KHNAM kala ai jingmut ia ka Expert Committee ba kan pyndep noh kloi katba lah ia ka jingbishar thymmai ia ka Reservation Policy.
Facebook
Instagram
Youtube
Twitter
Leave a Reply