Ai jingmynjur ka Sorkar ban pynlong kongsan ia ka jingtohkit lyngba ka Forensic

Syllad | The Rising MeghalayaJune 20, 2024

Ka Sorkar Jylla ka la ai ka jingmynjur ia ki kyndon na ka bynta ban pynlong kongsan ha kaba iadei bad ka jingtohkit lyngba ka Forensic ha ki jaka ba jia ki kam bymman (Forensic Crime Scene Investigation) kumba la pruid dak da ka Bharatiya Nagarik Suraksha Sanhita, 2023 (BNSS), ka ban bujli ia ka Criminal Procedure Code, 1973 (CrPC).

Haba kren sha ki lad pathai khubor hadien ka jingialang ha ka 19 tarik Jylliew, u Myntri ka Tnat Social Welfare u Bah Paul Lyngdoh u la ong ba ka Sorkar India ka la pynmih ia ka jingpynbna paidbah ba ka BNSS 2023 ka dei ban sdang treikam bujli noh ha ka jaka jong ka CrPC naduh ka 1 tarik u Naitung 2024.

“Kumta ka long kaba donkam ban pyntreikam ia ka BNSS, bad kine ki ain ialeh pyrshah kam bymman kin sdang ban treikam noh haduh ka 1 tarik u Naitung u ban wan, bad na ka liang ka Sorkar Jylla ka dei ban pynmih ia ka jingpynbna paidbah halor ka jingpyntreikam ia ka BNSS 2023 ha ka jaka jong ka CrPC,” ong u Bah Paul.

Nalor kata u Myntri u pyntip ruh ba na ka liang ka Kynhun Myntri ka la ai ruh ka jingmynjur ban pynlong kongsan ban pyntreikam da ka jingtohkit Forensic ha ki jaka ba jia ki kam bymman.

“Da kaba pyntreikam ia ka BNSS, 2023 ka la kylla long ka bynta kaba dei ban leh na ka bynta ka Jylla ban pynthikna ba ki stad Forensic kin leit sha ki jaka ba la jia ki kam bymman.Ki don bun ki jait kam bymman kiba kham triem ha kaba ka jingpynsaja ka long ban set phatok 7 snem kynthih ne palat,” ong u Myntri.

Kumjuh u la bynrap ba hapoh kane ka jingtyrwa kaba thymmai ba la aiti da ka Directorate of Forensic Science, kin don ruh ki kali ki ban iarap ban aijingshakri ia ka kynhun tohkit Forensic ki ban don ha baroh ki district headquarter.

Ha kawei pat ka bynta, na ka liang u Secretary incharge ka Tnat kam pohiing u Bah Cyril Diengdoh u la ong ba ka Sorkar Jylla ka la don mynta hapdeng ka jingpynkhreh ban pynmih shuh shuh ia ki kam na ka bynta ban kyntiew ia ka jingkhlain jong ka kynhun ki stad Forensic ha ka Jylla.