Ai jingmynjur ka sorkar iaka ‘service rules’ ka MPSC

Syllad | The Rising MeghalayaAugust 2, 2023

Ka kynhun Myntri ka sorkar Meghalaya haka sngi Balang kala ai ka jingmynjur ia ka ‘service rules’ jong ka Meghalaya Public Service Commission (MPSC) lyngba u Myntri Rangbah ka jylla u Conrad K Sangma.

Haba kren sha ki lad pathai khubor na ka liang u Conrad Sangma u la ong ba ka MPSC ka la treikam mynta lah da ki bun phew tylli ki snem hynrei kam don satia ia ka service rules na ka bynta ki nongtrei ki jong ka.

“Kumta ruh mynta ka sngi ha ka jingialang ka kynhun myntri ha kaba khatduh ngi la ai ka jingmynjur ha kaba iadei bad ka service rules jong ka MPSC,” ong u CM ka jylla. Nalor kata u Conrad u la pyntip ruh ba ka kynhun Myntri ka la ai ruh ka jingmynjur ha kaba iadei bad ki jingpynkylla ia ka  Meghalaya Medical Council Act (MMCA), 1987.

Kham hashwa ka ju don ka Medical Council of India (MCI) bad ha ka MMCA, ka kyntien MCI ka dang iai bteng ban don, hynrei kumba ia tip ba ka MCI ka la kylla bad mynta la tip kum ka  National Medical Commission (NMC), bad kumta ia katei ka kyntien la hap ban pynkylla ha ka Act jong ka MMCA.

“Ia kane ka jingpynkylla la wanrah mynta lyngba ka ordinance ia kaba la weng noh mynta da ka sorkar,” ong shuh shuh u CM ka jylla.