Ai jingmynjur ka Sorkar Meghalaya ban pyndonkam noh da ki kot NCERT hapoh ki skul ha ka jylla

Syllad | The Rising MeghalayaNovember 17, 2023

Ka Sorkar Jylla haka 16 tarik Naiwieng ka la ai ka jingmynjur halor ka jingtyrwa ban pyndonkam noh da ki kot jong ka National Council of Educational Research and Training (NCERT) hapoh ki skul ha ka jylla naduh kane ka snem ka ban wan.

Haba kren sha ki lad pathai khubor hadien ka jingialang jong ka kynhun myntri na ka liang Myntri Rangbah ka jylla u Conrad K Sangma ula ong ba ia kine ki kot ka NCERT yn pyndonkam naduh ka klas I haduh 10 jong ka Meghalaya Board of School Education (MBoSE).

“Hadien ka jingiamir jingmut ngi la shim ba bun na ki kot pule ia kiba la pyndonkam hapoh ka MBOSE khamtam ha kaba iadei bad bad ka standard jong ki sobjek, kata kum ka science, english bad mathematics, kine ki kot kim long katkum ka standard ha ka kyrdan jong ka ri ne national level, kumta khnang ban kyntiew ha baroh ki sobjek ngi la shim ia kane ka rai,” ong u CM.

Kumba ka long mynta hapoh ka MBOSE na ka bynta ki klas I, II bad III ki don haduh 11 tylli ki kot pule, hynrei hapoh jong ka NCERT ki don tang saw tylli ki kot. Kumta kan don ka jingduna kaba jur ha ka jingdon jong ki kot, kata kiba don tang ia ki bynta kiba  kongsan bad ka ban iarap ban pynlong ia ki khynnah ba kin ioh ka jingshemphang kaba pura.

Nalor kata u Myntri Rangbah u la ong ruh ba ki la shim ia ka rai ban peit ba kan ym don kano kano ka jingshah ktah halor ki jingthoh kiba iadei bad ki jingtip halor ka jylla kumjuh kiba iadei bad ka kolshor, histori bad ka jinglong kyrpang.