Ai jingsneng ka KSU ia uwei u bar jylla ba kynshlein kynthei ha Jowai

Syllad | The Rising MeghalayaJuly 7, 2021

Ka Khasi Students’ Union (KSU) Jowai Unit kala beh krad ia uwei u bar jylla ba trei kum u manager ha kawei ka petrol pump ha Jowai hadien ba ula shah kynnoh ba kynshlein kynthei haka sngi Balang.

U President ka KSU Jowai Unit u Ewanmi Phawa, ula ong ba hadien ba kila ioh iaka jingujor na kawei ka thei lud kaba 18 snem ka rta bad kynnoh utei u bar jylla ula leh iaki kam kynshlein kynthei mar mar kila hiar sha katei ka petrol pump ban tohkit.

Ula ong ba hadien ba kila lap ba kane ka jingkynnoh kalong kaba shisha kila ai jingsneng ia utei u bar jylla bad beh krad ia u bad um dei shuh ban trei ha katei ka jaka.

Ka KSU kala kynnoh ba une u bar jylla ula leh bunsien ia kum kine ki kam pyrshah iaki kynthei khynnah ba trei ha katei ka jaka bad shimkabu iaka jingduk jingkyrduh jong ki.

Naka liang ka seng ka la maham ia baroh ki bar jylla kiba trei hapoh ka Bri u Hynniewtrep ba kimdei ban jrong kti bad leh khlemakor, iaki kynthei khynnah bad ha kajuh ka por ka KSU ka kyntu iaki lanot ba shah thombor ban mih shakhmat bad ujor ia kum kine ki briew kiba thmu ban leh ia ki kam sniew kaba ktah iaka burom ka ujot jong ki kynthei khynnah bad longkmie.