Ai ka vote jong phi sha u Generous Pasleiñ, ngin kit ngin bah ma ngi ïaka eh ka shon jong phi: Hilarius Dkhar

Syllad | The Rising MeghalayaFebruary 14, 2023

U MDC barim jong ka Moobakhon-Khanduli u Ma Hilarius Dkhar ula buh kylli hato u Ma Sñiawbhalang Dhar lah mo ban rah sha bneng ïa ka spah ka phew kaba ula kynshew haduh mynta.

U Ma Hilarius ula pynkynmaw ïaki paidbah ba ha u snem 2008 haba u Ma Sñiawbhalang Dhar ula sdang ban ïakhun elekshon ula synniang da ki kali ki motor jong u bad ka spah ka phew ban pynjop ïa u.

U Ma Dkhar uba long u Kpa jong u Generous Pasleiñ u kyrtong Independent na ka Nartiang Constituency ula kren ia kine ki kyntien haka jingïalang ïalap elekshon jong u khun jong u ha Mynsngat ha sngi Nyngkong.

Mynta ula ïoh kynshew ïaka spah ka phew da ka jinglong MLA, hynrei u ma Sñiawbhalang u lah ne em ban rah ïa ka spah ka phew sha bneng, la ong u Ma Hilarius Dkhar bad bynrap ba ki donkam ka roi ka par ha baroh ki liang, ym dei tang ka kam shna surok.

U Ma Dkhar ula kyntu ïa ki paidbah ba kim dei ban pynlehnohei ïaka shi vote jong ki da kaba thep sha ka UDP, NPP lane Congress.

U la ong ka Congress ka juk jong ka, ka la kut wat lada jop makna u kyrtong jong ka, u sahep Emlang Laloo un nym lah ban thaw sorkar bad ha kajuh ka por u sahep Emlang udei ruh u briew uba ki paidbah kim ïoh ban ïakren bad pynsngew ïaki jingeh jingwit jong ki.

“Ai ka vote jong phi sha u Generous Pasleiñ, ngin kit ngin bah ma ngi ïaka eh ka shon jong phi met bad mynsiem bad lada phim mon hadien ka San snem pynïeng da uwei,” la ong u ma Hilarius MDC barim ka Moobakhon Khanduli.

Katba na ka liang jong u Generous Pasleiñ haka jingkren ula ong, ka jingïeng ïakhun ha kane ka election MLA ka long namar ba u thrang ban wanrah ka jingkylla hapoh ka Nartiang Constituency kynthup naduh ka pule puthi, ka rep ka riang, ka koit ka khiah, ban kyntiew ïaka kam ïalehkai, ka kam jngohkai pyrthei, ki lynti synkieng, ki ïew ki hat bad kiwei kiwei ki jingdonkam ka Constituency.

Ula ong hapoh ka Nartiang Constituency ki samla kiba la don ka jingnang jingstad kim ïoh kam ïoh jam wat lada ki kmie ki kpa ki shah shitom ban pynlut pynsep ban pynnang pynstad ïaki bad kane ka jia dei namar bym don u nongmihkhmat ban prat lynti ïaki.

Ula khot la wer ïaki paidbah ka Constituency ban ïatreilang ban pynurlong ïaki jingangnud jong u bad jong u Kpa jong u ban wanrah ka roi ka par hapoh ka Constituency kaba dei kawei na ki Constituency kaba sahdien tam hapoh ka Jylla.