Ai khublei Behdieñkhlam Tuber ka KSU Khliehriat Circle

Syllad | The Rising MeghalayaJuly 17, 2021

Ka Khasi Students’ Union (KSU), Khliehriat Circle kala ai khublei Behdieñkhlam ba suk ba kmen ia baroh ki khun ka Raij Tuber khamtam kiba dang ksoh iaka Niamtre.

Ka KSU lyngba u Streamly N Suchen president KSU Khliehriat Cirlce bad u Cherity Suja general secretary KSU Khliehriat Circle kila ai khublei iaka Seinraij Tuber kaba la lah ban pynlong biang iaka Behdieñkhlam ka raij Tuber kaba la sdang naduh ka 16 tarik haduh 19 tarik une u bnai Naitung da kaba bud ryntih iaki adong adit COVID-19.

“Ha kum kane ka por ka KSU Khliehriat kum dak ban ia shim bynta lang ka sngew dei ban ai khublei Behdieñkhlam ia baroh ki khun ka Bri u Hynñiew Trep Hynñiew Skum, Hynñiew Wasa bad kyrpang eh ia ki khun u raiot jong ka Seinraij Tuber da ka mynsiem shit rhem bad sngew sarong ba ka Seiñraij, Tuber kala lah biang ban pynlong iaka Behdieñkhlam da kaba bud ryntih iaki adong COVID-19. Ngi kyrmen ba kane ka Behdieñkhlam kan poi sha ka thong bad ngi ngeit kumba la ngeit kan beh sha jngai iaka khlam ka ngoh sha ka ri ba sepngi.” la ong ki nongialam ka KSU Khliehriat.

Ka KSU ka kitbok kit rwiang ba kane ka Behdieñkhlam kan iaid beit iaid ryntih haka jingrakhe pyndep iaka niam watla hap ban pynrit iaka jinglehniam bad ka jinglehkmen iaka Behdieñkhlam bad ba u blei nongbuh nongthaw un da un ker ia ngi lang baroh bad ban rat dyngkhong ia kane ka khlam ka ngoh bad weng baroh ki rai eh rai dam kiba long ki mawjynthud ia ngi u khun bynriew.