Ai Khublei Behdieñkhlam ka KSU Khliehriat Circle iaki khun ka Seinraij Jowai

Syllad | The Rising MeghalayaJuly 10, 2021

Ka Khasi Students Union (KSU) Khliehriat Cirlce, ka shim ia kane ka kabu ban ai khublei Behdieñkhlam basuk ba kmen ia baroh ki khun Niamtre jong ka Seiñraij Jowai.

Ka KSU lyngba u kyrwoh bala phah da u SN Suchen, president KSU Khliehriat Circle ula ong “Ngim lah khlem lah da pynpaw ia ka jingsngewnguh kaba khraw ia u Trai Kynrad uba la don ryngkat bad ki khun ki hajar jong u Hynñiewtrep Hynñiewskum. Ha kum kane ka por lehkmen Behdieñkhlam jong ka Seiñraij Jowai ngi ngeit skhem ba lyngba kane ka Behdieñkhlam kaba jingthmu jong ka ka dei ban beh iaka sniew ka smeh bad ka khlam haka imlang ka sahlang kan beh shajngai iaka khlam COVID-19 na rilum Jaintia, ka Jylla bad satlak ka pyrthei.”

U ma Suchen, ula ong ba KSU, Khliehriat Circle baroh kawei ka kitbok kitrwiang iaki nongialam ka Seiñraij Jowai, u Dolloi u khlieh jong ka niam ka rukom bad baroh ki khun ki hajar jong ki paid riewngeit Niamtre ba kin ioh ka met kaba koit kaba khiah bad ban bha ka kamai ka kajih, ka pule ka puthi bad ban roi par salonsar.