Ai khublei iaka Trinamool Congress kaba sei madan iaka jingbymbiang ka Meghalaya Games

Syllad | The Rising MeghalayaMay 3, 2022

Ka long ka khubor kaba shisha bad la I sangsot bad syrtok shisha ban shem bad iohi, ia ki nongialehkai jong ka jylla, kaba ha ki sanphew snem kiba ka jylla kala ioh ia la ka jong ka jylla kaba pura, pynban ka janor ki nongkitkam kala hiar arsut haduh kata kata kaba tang iaka jaka ban shong ban sah ban sum ban sait ban leit bar da isait met ban peit ia ki.

Wat lada ki bor pyniaid ka Meghalaya State Olympic Association (MSOA), ki pyrshang ban tep eit miaw, hynrei ka jingshisha hi ka mih paw naka kynhun jong ki khynnah ialehkai kiba la wan poi ha kane ka nongbah haka sngi Nyngkong, ban ia mih madan naka bynta ka 4th Meghalaya Games ban plie ia ka pyrda ka jong ka mynta ka sngi.

Marsein iohi ia ki dur ki dar ka jingbym biang lut ka rukom pynkhreh pynkhrum khamtam lei lei ka jaka ban shong ban sah jong ki khynnah ba ialehkai, na ka liang u Myntri Rangbah ka jylla lyngba ka twitter u la kren da kaba shai kdar ba na ka liang ka jong u, da lei lei un nym ia peiñ ne pdiang ia kum kane ka rukom pynkhreh bad u dawa na ki nongkitkam ka MSOA ba kin shimkhia ban pynbit pynbiang lut kat kum ba dei hok.

Pynban ka khubor naka MSOA, ki pynpaw ba ki dur ki dar jong kita ki jaka leit bar ne ki painkhana ki kam ba shwa ban thmu pynlong ia kane ka lympung bah ialehkai, ka la don ka jingleit ban jurip ryngkat bad uta u field officer ka JN Stadium, Polo, bad ha kane ka jingjurip na ka liang ka organising committee ka Meghalaya games, ki la shim ia kata ka rai ban nym shah ne khang dam noh shi syndon ia kine ki painkhnana, ia kaba la kam ba kidei ba la pynpra ia ki hadien ba la sdang ban maramot iaka JN Stadium Polo.

Kaba lyngngoh pat, kaei pat ba ki don ban pynshai ia ka jaka shong ne sah ka kynhun ialehkai ba dei na rilum Garo, kaba ka kynhun ki samla jong ka seng All India Trinamool Congress (AITC), ryngkat ki dur ka pynpaw tyngkrein ia kawei na ki dur ka jaka kaba don shi kynhun jong ki khynnah kiba kat kum n aka dur, I thamula bad da I kynsha bha ia kane ka jaka ba la pynshong ia ki nongialehkai.

Khublei iaka kynhun ki samla ka Trinamool Congress kaba la sei madan ia kane ka jingshisha bad jyrwait iaka shkor jong ka sorkar bad organising committee halor kane ka kam torti.

Da kumta, ka por ka long kaba donkam ba ka sorkar bad ka MSOA kim dei ban khein dewthala ne pyni ia kum kine ki rukom treikam kaba thurmur ne kaban shu leh ia kano kano ka kam tang dep, namar ym dei ban klet ba ha lyndet jong kie ki kam torti baroh, ka mang pisa kaba heh la dep ban bhah naka bynta ban pynlut ha kaban pynlong ia kane ka lymung kata ym duna iaka T. 2 klur tam.