Ai khublei ka JHTOA ïa u Ma Lber Laloo bad ka sorkar MDA kiba iakhun ban pyllait dewiong

Syllad | The Rising MeghalayaJuly 9, 2019

JOWAI: Ka Jaiñtia Hills Truck Owner’s Association (JHTOA) ka ai ka jingkhublei kaba kyrpang bad pynpaw ruh ka jingsngewnguh kaba khraw ia u Ma Lber Laloo bad kiba u don jingiadei kumjuh ruh ïa u Conrad K Sangma, Myntri Rangbah ka Jylla uba ialam iaka sorkar MDA kiba la shimkhia ban ïakhun iaka mukotduma ha ïingbishar Supreme Court na ka bynta ban pyllait ïaka jingkhang tih dewiong haka Jylla.

U Ma Nidamon Chulet President ka JHTOA ula ong ba a synjuk ka khublei kyrpang ïa u Ma Lber Laloo uba la trei shitom bha met bad mynsiem ban ïakhun ïa kane ka mukotduma ha Supreme Court pyrshah ïaka jingkhang tih dewiong ka NGT ha jylla haduh ba ka iingbishar ba hakhliehduh ka ri kala rai ban pynkut iaka mukotduma.

U Ma Nidamon ula kyntu ïaka sorkar ban pynsted bad ban shimkabu kloi katba lah kloi ïaka rai jong ka Supreme Court ban myntoi u paidbah khamtam ka synjuk ki nongniah trok bad trai trok kiba shah ktah bha haka kamai kajih naduh ba khang ka jingtih dewiong ha Jylla.

Ka ïingbishar ba hakhliehduh ka ri kala ai bor iaka sorkar jylla ban shna ïaki aiñ tih dewiong ba ïadei bad ka mariang bad ka JHTOA kala ban jur ïaka sorkar ban pynbiang ïaka mining plan bad ïaki kyndon ban ioh tih dewiong ba thymmai katkum ka aiñ tih mar poh khyndew khnang ba ka khaii pateng kan iaid beit iaid ryntih.