Ai khublei ka JSU bad Synjuk Waheh Chnong Jowai ia u Lahkmen Rymbui ba shimkhia pynioh iaka B.Ed ha Kiang Nangbah Govt. College

Syllad | The Rising MeghalayaMarch 7, 2023

Hadien ba ka National Council for Teacher Education (NCTE) ka la ai jingbit ïaka sorkar Jylla ban sdang noh ïaka 4 Year Integrated Teacher Education Programmes haka kyrdan B.Ed ha Kiang Nangbah Government College, ka Joint Action Committee (JAC) kaba kynthup ïaka Jaintia Students’ Union (JSU) bad ka Synjuk Waheh Shnong Jowai ka la pynpaw ka jingsngewnguh bad ai khublei kyrpang ïa u myntri barim ka tnad pule puthi ka sorkar jylla u Ma Lahkmen Rymbui.

U General Secretary ka JSU haba kren sha ki lad pathai khubor haka sngi ba Ar, ula ong ka JAC ka pynpaw ka jingsngewnguh ïa u Ma Lahkmen Rymbui ba lyngba ka jingshimkhia jong u, la ïoh ïaka BEd college ha Kiang Nangbah kaba la ithuh da ka NCTE napoh Delhi.

Ula pynkynmaw ba ïaka BEd College ka JSU ka la dawa naduh u snem 1987 haduh mynta.

Ula ïathuh kumba long mynta ïaka Building kaba don ha Mynthong la pynlong ïaka kum ka 10+2 Higher Secondary School. Ha kaba ïadei bad kane ka JSU ka la dep ban buddien ryngkat bad ka Synjuk Waheh Shnong Jowai da kaba ïakynduh ïa u Ma Lahkmen Rymbui ha u bnai August mynshem snem bad la phah ruh ïaka shithi sha Delhi haka Member Secretary NCTE ha u bnai Nalur u snem bala dep.

Haka 5 tarik une u bnai ula ong ba ki la ïoh jingtip na u Ma Lahkmen Rymbui ba la ithuh pura ïaka daka NCTE kum ka B.Ed College kaba long 4 snem ka (Integrated Course).

Ula ïathuh ruh ba ki la dep ban ïakren bad ka Principal jong ka Kiang Nangbah Govt. College bad ka la pyntip ba ka recognition kadei kaba shisha hynrei dang don pat ki kyndon kiba ka College ka hap ban pyndep shwa ban plie ïaka ha une u snem, kata ban thung iaki nonghikai bad ki nongtrei.

Ka sorkar Jylla ha u snem bala dep kala dep mynjur ban thung nonghikai sa 13 ngut kaba mynta ka Kiang Nangbah College ka don tang 7 ngut ki nonghikai.

Tang ka recognition ne ka jingithuh kam pat kut, hynrei ngin ïai buddien khnang ban long ka BEd College kaba pura kumba la angnud ba kiba bun ki khun samla, la ong Treiborlang.

Ka jingïoh ïaka B.Ed College ka long ka jingkyrkhu ïaka Rilum Jaiñtia namar ym pat la don jaka pule kum kane hapoh ka District namar ba ka Integrated Course ka long ba ki samla pule kiba kwah pule BEd kin ioh iaka kyrdan BA & BEd, BSc & BEd lane BEd BCom ha juh ka por katkum ka policy thymmai ka NEP.

Ula pyntikna ruh ba ka JSU ryngkat ka Synjuk Waheh shnong kin bteng ban buddien ban pynkloi ïaka kam lyngba ka sorkar ba thymmai MDA-2.