Ai khublei ka NPP Jaintia Hills iaka Sorkar MDA ba la plie iaka jingtih dewiong stad saian

Syllad | The Rising MeghalayaMarch 19, 2025

Ka National People’s Party (NPP) Jaintia Hills, kala pynpaw iaka jingsngewnguh bad ai khublei kyrpang iaka sorkar MDA-II kaba la lamkhmat da u Myntri rangbah Conrad K. Sangma ban sdang iaka kam tih dewiong da ka stad saian ne ka scientific mining ka ban sdang pyntreikam nyngkong eh ha ka jylla ha Saryngkham-A’ Coal Mine, Byndihati, East Jaintia Hills District.

Ia kane kam tih dewiong thymmai la plie paidbah da u Myntri Rangbah ka Jylla u Conrad K Sangma ha ka 17 tarik Lber lyngba ka video conferencing.

Haba kren shaki lad pathai khubor u MLA ka Jowai bad State President ka NPYF Ma Wailadmiki Shylla ula ong naduh ba la khang iaka jingtih dewiong ha u snem 2014 kala ktah bha iaka ioh ka kot bad ka lad kamai jakpoh jong ki nongshong shnong ka rilum Jaintia kiba shaniah haka kam dewiong.

Ula ong ruh ba ka jingtreishitom jong ka sorkar MDA ha u 2019 kala shimkhia ban weng iaka jingkhang tih dewiong thliew khnai bad na ka liang ka iing bishar ba hakhlieh duh ka Supreme Court kala hukum ba dei ban tih ia u dewiong da ka stad saian.

Ula ai khublei iaka Ministry of Coal kaba la iarap bad pdiang iaki lai tylli ki Mining Plan, u ngeitskhem ba haki sngi ban wan yn ioh shuh shuh ban pyllait iaki mining plan khnang ba ki nongshong shnong jong ka rilum Jaintia bad ka Jylla kan kiew haka kamai kajih kumba ju long haki por mynshwa.

Ula kyntu ruh ia kito kiba don jaka dewiong, ban wan shakhmat ban aplai iaki kot ki sla lyngba ka Scientific Mining khnang ba ka kamai kajih jong ki ruh kan iaid shakhmat ryngkat ka jingiada iaka mariang.

Ka thong jong ka sorkar ka long ban iarap ia u paidbah, hynrei kum ka sorkar ka hap ruh ban pyrkhat na ka bynta ka mariang, la ong u Ma Wailadmiki Shylla bad u khmih lynti ba da ka jingioh iaki lai tylli ki Mining plan kan long ka jingbtin lynti bad iarap pat ia kito kiba don iaki jaka kiba rit khnang ba kin ioh biang ban tih ia u dewiong khlem da ktah iaka mariang.